जागतिक अस्थिरतेपायी रिझर्व्ह बँकेच्या सुवर्णसाठ्यात वाढ

विश्लेषकांच्या मते, करोनानंतर जगातील बहुतांश बँकांनी सोन्याच्या साठ्यात वाढ करण्यास सुरुवात केली. जागतिक महागाईचा उसळलेला आगडोंब आणि व्याजदर चढउतारांच्या पार्श्वभूमीवर मध्यवर्ती बँका अधिकाधिक जोखीम-दक्ष बनल्याने त्या अक्षय्य मूल्य असलेल्या सोन्याचा आश्रय घेत आहेत. रिझर्व्ह बँकेनेदेखील तोच मार्ग अनुसरताना, सुवर्ण संचय वाढवत नेला आहे. ‘जागतिक सुवर्ण परिषद’ अर्थात ‘वर्ल्ड गोल्ड कौन्सिल’च्या आकडेवारीनुसार, मध्यवर्ती बँकांनी २०२२ मध्ये त्यांच्या सोन्याच्या साठ्यात ७० अब्ज अमेरिकी डॉलर मूल्याचे १,१३६ टन सोने खरेदी केले आहे, जे १९६७ नंतरचे खरेदीचे सर्वोच्च प्रमाण आहे. सोने हे सीमांचे बंधन नसलेल्या चलनासारखे आहे, म्हणजेच कोणत्याही देशात त्याला मान्यता असल्याने जागतिक अनिश्चिततेच्या वातावरणात ते एक सुरक्षित मालमत्तेचे साधन ठरते.