हितसंबंधांचा संघर्षा’च्या प्रकटीकरण सक्तीचे;नवीन ‘सेबी’ अध्यक्षांची लवकर चौकट आखण्याची ग्वाही

बुच यांच्यावर झालेल्या आरोपांमध्ये एका विदेशातील फंडात त्यांच्या वैयक्तिक गुंतवणुकीचा समावेश होता जेथे, अदानी समूहाशी संलग्न कंपनीदेखील सह-गुंतवणूकदार होती. असे हितसंबंध गुंतले असताना, बूच यांच्या नेतृत्वात ‘सेबी’कडून निष्पक्षपणे चौकशी कशी केली जाईल, असा प्रश्नही उपस्थित केला गेला होता. या आरोपांना उत्तर देताना, अदानी समूहावरील आरोपांची योग्य चौकशी करण्यात आल्याचे सेबीने नमूद केले होते. शिवाय बुच यांनी ‘संबंधित प्रकटीकरण’ वेळीच केले होते आणि आवश्यकतेनुसार स्वतःला चौकशी प्रक्रियेपासून दूरही केले होते, असाही खुलासा करण्यात आला होता.

अलीकडेच म्हणजे १ मार्चपासून बुच यांच्या जागी आलेले पांडे म्हणाले, सेबीच्या संचालक मंडळातील सदस्यांच्या हितसंबंधांच्या संघर्षासह इतर विविध उपाययोजनांवर अधिक पारदर्शक राहण्याला त्यांच्या लेखी सर्वोच्च प्राधान्य असेल. हितसंबंधांच्या संघर्षांना अधिक पारदर्शकपणे जनतेसमोर प्रकट होतील यासाठी स्वतःची योजना घेऊन लवकरच पुढे येणार आहोत, अशी पुस्ती त्यांनी जोडली.

परदेशी गुंतवणूकदारांचे अधिक तर्कसंगत नियमन

परदेशी गुंतवणूकदार वेगाने बाहेर रस्ता धरत असल्याबद्दल व्यक्त होत असलेल्या चिंतेच्या पार्श्वभूमीवर, सेबीप्रमुख पांडे म्हणाले भांडवली बाजार नियामक त्यांच्या कामकाजाचे नियमन अधिक तर्कसंगत करू पाहत आहे. ते म्हणाले, परदेशी भांडवल आकर्षित करण्यासाठी अनुकूल वातावरण निर्माण करणे गरजेचे असल्याचे आम्ही जाणतो. असे गुंतवणूकदार आणि उद्योग सहभागींशी त्यांच्या अडचणी दूर करण्यासाठी आणि त्यांचे येथील व्यवहार सुलभ करण्यासाठी अनावश्यक आणि कालबाह्य नियमांवर पुनर्विचार करण्याच्या तयारीसह, संबंधितांशी संवादही साधला जाईल. भारत दीर्घकालीन गुंतवणुकीसाठी एक उज्ज्वल ठिकाण आहे आणि आपल्याला देशांतर्गत आणि परदेशी दोन्ही भांडवल गरजेचे आहे, असे ते म्हणाले.