”…तर फाशी द्या, आम्ही तयार, खोटा प्रचार करत नाही”; रामदेव बाबा यांनी स्पष्टच सांगितलं

योग आणि आयुर्वेदाच्या विरोधात प्रचार

रामदेव बाबा यांनी पत्रकार परिषदेत पत्रकारांना सांगितले की, ते देशाच्या न्यायव्यवस्थेचा आदर करतात. सर्वोच्च न्यायालय, कायदा आणि देशाच्या संविधानावर पूर्ण विश्वास आहे. ते अपप्रचार किंवा खोटा प्रचार करत नाही. मॉडर्न सायन्स आणि अॅलोपॅथीच्या डॉक्टरांवर आरोप करत ते म्हणाले की, ते आयुर्वेद आणि योगाबद्दल खोटा प्रचार करीत आहेत. रक्तदाब, शुगर, थायरॉईड, दमा, यकृत आणि मूत्रपिंड निकामी होणे यांसारख्या आजारांवर जगात उपाय नाही, अशी चुकीची माहिती देशात सतत पसरवली जात असल्याचा आरोप त्यांनी केला. असे शेकडो रुग्ण आपल्याकडे येत असल्याचे त्यांनी सांगितले. तसेच जास्त वजन असलेल्या लोकांचे वजन कमी करण्यास मदत करतो, ज्याला १० दिवस लागतात.

औषधे संशोधनावर आधारित आहेत

त्यांची औषधे संशोधनावर आधारित असल्याचा दावा बाबा रामदेव यांनी पत्रकार परिषदेत केला. आमच्या औषधांनी बरे झालेले रुग्ण सर्वोच्च न्यायालयासमोर आणण्यास तयार असल्याचे त्यांनी सांगितले. त्यांच्याकडे ज्ञान आणि विज्ञानाचा खजिना असल्याचे बाबा रामदेव म्हणाले. गर्दीच्या जोरावर सत्य आणि असत्य ठरवता येत नाही. वैद्यकीय माफिया त्यांच्या विरोधात खोटा प्रचार करीत आहेत. त्याचे गुपित उघड होत आहे. पतंजलीकडून कधीही खोटा प्रचार केला जात नाही. जे खोटी माहिती पसरवत आहेत, त्यांची चौकशी करून अशा लोकांवर कारवाई झाली पाहिजे. आजारांच्या नावाखाली सर्वसामान्यांना घाबरवण्याचा प्रयत्न केला जात आहे. पतंजलीने स्वदेशी चळवळीला चालना दिली आहे, असंही रामदेव बाबा यांनी अधोरेखित केलं आहे.