मुंबई: प्रमुख निर्देशांक सेन्सेक्स आणि निफ्टी यांनी मंगळवारी सलग दुसऱ्या सत्रात सकारात्मक बंद नोंदवला. जागतिक बाजारपेठेतील कल आणि देशांतर्गत आघाडीवर बँकांच्या समभागांमध्ये विशेषतः स्थानिक संस्थात्मक गुंतवणूकदारांच्या खरेदीने निर्देशांकांना तेजीचे बळ दिले.
मंगळवारच्या सत्रात मुंबई शेअर बाजाराचा निर्देशांक सेन्सेक्स ३६३.९९ अंशांनी वधारून ८०,३६९.०३ पातळीवर बंद झाला. दिवसभरात त्याने ७९,४२१.३५ हा नीचांक, तर ८०,४५०.४८ ही सत्रातील उच्चांकी पातळी गाठली. दुसरीकडे राष्ट्रीय शेअर बाजाराचा निर्देशांक असलेल्या निफ्टीने १२७.७० अंशांची कमाई केली आणि तो २४,४६६.८५ पातळीवर बंद झाला.
हेही वाचा : ‘जिओ पेमेंट सोल्युशन्स’ला रिझर्व्ह बँकेचा ऑनलाइन देयक मंच म्हणून परवाना
राष्ट्रीय शेअर बाजाराचा निर्देशांक निफ्टीने नकारात्मक पातळीवरून व्यवहाराला सुरुवात केली. निर्देशांकात सर्वाधिक योगदान राखणाऱ्या निवडक कंपन्यांच्या समभागांमधील चौफेर खरेदीने निर्देशांक वधारले. विशेषत: बँकिंग क्षेत्रातील समभाग जसजसे वधारले, तसतसे बाजार निर्देशांकही चढत गेले, असे निरीक्षण रेलिगेअर ब्रोकिंग लिमिटेडचे संशोधन विभागाचे वरिष्ठ उपाध्यक्ष अजित मिश्रा यांनी नोंदवले.
देशांतर्गत संस्थात्मक गुंतवणूकदारांनी (डीआयआय) अखंडपणे खरेदी सुरू ठेवल्यानेही तेजीला मदत झाली. सेन्सेक्समध्ये स्टेट बँकेच्या समभागाने ५ टक्क्यांनी झेप घेतली, त्यापाठोपाठ आयसीआयसीआय बँक, बजाज फिनसर्व्ह, एनटीपीसी, अदानी पोर्ट्स, बजाज फायनान्स आणि लार्सन अँड टुब्रो यांचे समभाग तेजीत होते. तर मारुती, टाटा मोटर्स, सन फार्मा, भारती एअरटेल, इंडसइंड बँक आणि महिंद्र अँड महिंद्रच्या समभागांनी गुंतवणूकदारांची निराशा केली. दुसरीकडे संस्थागत गुंतवणूकदारांनी सोमवारच्या सत्रात ३२२८.०८ कोटी रुपये मूल्याच्या समभागांची विक्री केली तर देशांतर्गत गुंतवणूकदारांनी १,४००.८५ कोटी रुपयांचे समभाग खरेदी केले.
हेही वाचा :मुहूर्ताचे सौदे यंदा शुक्रवारी संध्याकाळी
सेन्सेक्स : ८०,३६९.०३ ३६३.९९ ( ०.४६%)
निफ्टी : २४,४६६.८५ १२७.७० ( ०.५२%)
डॉलर : ८४.०७ – ००
तेल : ७१.८९ ०.६६
