भांडवली लाभ करात (Capital Gains Tax) बदल करण्याचा कोणताही प्रस्ताव सरकारकडे आलेला नाही, असं स्पष्टीकरण प्राप्तिकर विभागाने जारी केलेल्या एका निवेदनात दिले आहे. आयटी विभागाने हे प्रसिद्धी पत्रक मीडिया रिपोर्टनंतर जारी केले आहे, ज्यामध्ये दावा करण्यात आला होता की, सरकार कॅपिटल गेन टॅक्समध्ये मोठा बदल करणार आहे. प्राप्तिकर विभागाने केलेल्या ट्विटमध्ये म्हटले आहे की, भांडवली लाभ करात बदल करण्याचा सरकारसमोर कोणताही प्रस्ताव नाही. हे ट्विट आल्यानंतर त्या सर्व अटकळांना पूर्णविराम मिळाला, ज्यात भांडवली लाभ कराबाबत वेगवेगळे दावे केले जात होते.
मीडिया रिपोर्टमध्ये हा दावा करण्यात आला
काल ब्लूमबर्गने मीडिया रिपोर्टमध्ये दावा केला होता की, सरकार कॅपिटल गेन टॅक्सचे दर वाढवू शकते आणि तसा प्रस्ताव सरकारकडेही आहे. हा अहवाल समोर आल्यानंतर प्राप्तिकर विभागाने त्याचा इन्कार केला. किचकट नियम सुटसुटीत करण्यासाठी आणि पंतप्रधान नरेंद्र मोदी पुढील वर्षी निवडणूक जिंकल्यास उत्पन्नातील असमानता दूर करून अर्थव्यवस्था मजबूत करण्यासाठी भारत आपल्या प्रत्यक्ष कर कायद्यांमध्ये फेरबदल करण्याचा विचार करीत आहे, असं ब्लूमबर्गच्या अहवालात म्हटलं होतं. त्यावरच आता प्राप्तिकर विभागाने स्पष्टीकरण दिले आहे.
अहवालानंतर शेअर बाजारात मोठी घसरण झाली
दुपारी दीडच्या सुमारास हा मीडिया रिपोर्ट आला. त्यानंतर शेअर बाजारात लगेचच उच्च स्तरावरून विक्री झाली आणि सेन्सेक्स जवळपास 250 अंकांनी घसरला. ट्रेडिंग सत्राच्या शेवटी शेअर बाजारात थोडी रिकव्हरी झाली असली तरी BSE बेंचमार्क सेन्सेक्स ०.३० टक्क्यांनी घसरून ५९,७२७ अंकांवर बंद झाला.
डेट म्युच्युअल फंडातून कॅपिटल गेन टॅक्स बेनिफिट काढून टाकला
सरकारने गेल्या महिन्यात आणलेल्या आर्थिक विधेयक २०२३ मध्ये कर्ज म्युच्युअल फंडांमधून दीर्घ भांडवली नफा करासह इंडेक्सेशनचा फायदा काढून टाकण्यात आला. आता तुमच्या स्लॅबनुसार त्यावर कर आकारला जाईल.
कॅपिटल गेन टॅक्स म्हणजे काय?
उत्पन्न मिळावे म्हणून सरकार गुंतवणूकदारांवर विविध प्रकारचे कर लादते. यापैकी एक म्हणजे कॅपिटल गेन टॅक्स असतो. जेव्हा एखादा गुंतवणूकदार आपली मालमत्ता, घर, कार, बँक एफडी इत्यादी विकतो, तेव्हा त्याच्या विक्रीतून मिळालेल्या नफ्यावर कर आकारला जातो, ज्याला भांडवली नफा कर (Capital Gains Tax) म्हणतात. कारण सरकार याला उत्पन्नाचा एक भाग मानते. २०१८ मध्ये कॅपिटल गेन टॅक्सला शेअर बाजाराशी जोडण्यात आले. सोप्या शब्दात सांगायचे झाल्यास भांडवली लाभ कर म्हणजे कोणतेही भांडवल किंवा मालमत्ता विकून मिळणाऱ्या नफ्यावर कर म्हणजेच कॅपिटल गेन टॅक्स होय.
