मुंबई : माहिती-तंत्रज्ञान क्षेत्रातील विप्रोच्या समभागाने सोमवारी मोठी उसळी घेतली. कंपनीचा समभाग ९ रुपयांनी वधारून २७७ रुपयांवर बंद झाला. कंपनीने समभाग पुनर्खरेदी (बायबॅक) योजना जाहीर केल्याने ही तेजी दिसून आल्याचे बाजार विश्लेषकांनी सांगितले. विप्रोने भांडवली बाजाराला माहिती देताना, कंपनीच्या संचालक मंडळाची बैठक २६ एप्रिलला होणार असून, या बैठकीत समभाग पुनर्खरेदीचा निर्णय विषयपत्रिकेवर असल्याचे स्पष्ट केले आहे. या वृत्ताचा समभाग मूल्यावर सकारात्मक परिणाम दिसून आला. विप्रोचा समभाग सोमवारी सत्रारंभी ३७५ रुपयांवर व्यवहार करीत होता, तो नंतर ३७८ रुपये या दिवसभरातील उच्चांकी पातळीवर पोहोचला. बाजार बंद होताना तो ३७७ रुपयांवर स्थिरावला. मागील सत्राच्या तुलनेत विप्रोच्या समभागात ९ रुपयांची वाढ नोंदवण्यात आली. शुक्रवारच्या सत्रात विप्रोचा समभाग ३६८ रुपयांवर बंद झाला होता.
