जूनमध्ये भारताच्या घाऊक महागाईत सलग तिसऱ्या महिन्यात मोठा दिलासा दिला आहे. वाणिज्य मंत्रालयाच्या आकडेवारीनुसार, भारताचा घाऊक महागाई दर जूनमध्ये वार्षिक आधारावर उणे ४.१२ टक्क्यांपर्यंत खाली आला, तर मे महिन्यात तो उणे ३.४८ टक्के होता. भारताचा घाऊक महागाई दर ८ वर्षांतील नीचांकी पातळीवर आला आहे. मासिक आधारावर जूनमध्ये घाऊक महागाई दर ०.४० टक्क्यांनी घसरला. जूनमध्ये घाऊक महागाई दरात घसरण मुख्यत्वे खनिज तेल, अन्न उत्पादने, मूलभूत धातू, कच्चे पेट्रोलियम आणि नैसर्गिक वायू आणि कापड यांच्या किमती कमी झाल्यामुळे झाली. गेल्या वर्षी जूनमध्ये तो १६.२३ टक्के होता.
अन्न निर्देशांकातील घाऊक महागाई जूनमध्ये वर्षभराच्या तुलनेत १.२४ टक्क्यांनी घसरली, जी महिन्यापूर्वी १.५९ टक्क्यांनी घसरली होती. जूनमध्ये प्राथमिक वस्तूंची महागाई २.८७ टक्क्यांवर आली. खाद्यपदार्थांच्या श्रेणीमध्ये जूनमध्ये भाज्यांच्या महागाईत २१.९८ टक्क्यांनी घट झाली, तर डाळी आणि दुधाच्या महागाईत जूनमध्ये ९.२१ टक्के आणि ८.५९ टक्क्यांनी वाढ झाली.
हेही वाचाः दोन लाखांच्या गुंतवणुकीने सुरुवात अन् आज २ लाख कोटींचे मालक, आता कन्येच्या हाती कंपनीची कमान
जूनमध्ये इंधन आणि विजेच्या महागाई दरात १२.६३ टक्क्यांची घट झाली आहे. मे महिन्यात २.९७ टक्क्यांनी घसरून उत्पादित उत्‍पादनांची महागाई जूनमध्‍येही २.७१ टक्क्यांवर आली आहे. मासिक आधारावर मे आणि जूनमध्ये उत्पादित उत्पादनांच्या महागाईत ०.५० टक्क्यांनी घट झाली आहे. इंधन आणि उर्जा श्रेणींमध्ये एलपीजी, पेट्रोल आणि एचएसडी महागाई अनुक्रमे २२.२९ टक्के, १६.३२ टक्के आणि १८.५९ टक्क्यांनी घसरली. क्रूड पेट्रोलियम महागाई जूनमध्ये वार्षिक ३२.६८ टक्क्यांनी घसरली.
हेही वाचाः विश्लेषण : आता भारताच्या UPI चा फ्रान्समध्ये वाजणार डंका, त्याचा काय होणार फायदा?
जून किरकोळ महागाई वाढली
बुधवारी सांख्यिकी मंत्रालयाने जारी केलेल्या आकडेवारीनुसार, मे महिन्यात वार्षिक आधारावर भारतातील किरकोळ चलनवाढीचा दर २५ महिन्यांच्या नीचांकी ४.२५ टक्क्यांवर पोहोचल्यानंतर जूनमध्ये ४.८१ टक्के झाला आहे. किरकोळ महागाई सलग चौथ्या महिन्यात RBI च्या अंदाजानुसार २-६ टक्क्यांच्या आत राहिली.
