भारताची पामतेल आयात मे महिन्यात १४.५९ टक्क्याने कमी होऊन ४ लाख ३९ हजार १७३ टनांवर आली आहे. याचवेळी कच्च्या सूर्यफूल तेलाची आयात मोठ्या वाढली आहे आहे, अशी माहिती सॉल्व्हन्ट एक्स्ट्रॅक्टर्स असोसिएशनने (एसईए) गुरुवारी दिली.
एसएईने दिलेल्या माहितीनुसार, वनस्पती तेलाच्या आयातीत जगात भारताचा प्रथम क्रमांक लागतो. भारताने मागील वर्षी मे महिन्यात पामतेलाची ५ लाख १४ हजार २२ टन आयात केली होती. यंदा मे महिन्यात त्यात घट झाली आहे. याचबरोबर एकूण वनस्पती तेलाच्या आयातीतही किंचित घट झाली आहे. ही आयात मे महिन्यात १० लाख ५८ हजार २६३ टन आहे. मागील वर्षी मे महिन्यात ही आयात १० लाख ६१ हजार ४१६ टन होती. देशाच्या एकूण वनस्पती तेल आयातीत पामतेलाचा वाटा ५९ टक्के आहे.
हेही वाचाः वस्तू व्यापार तूट मे महिन्यात २२.१ अब्ज डॉलरच्या उच्चांकी पातळीवर; निर्यातीत १० टक्के घट
सूर्यफुल तेलाच्या आयातीत मेमध्ये मोठी वाढ नोंदवण्यात आली आहे. ही आयात २.९५ लाख टन आहे. मागील वर्षी मे महिन्यात ही आयात १.१८ लाख टन होती. खाद्यतेलाचा देशातील साठा सध्या ७.३८ लाख टन आहे. याचबरोबर आगामी काळात २२.०३ लाख टन खाद्यतेलाची देशात आयात होईल. भारत प्रामुख्याने इंडोनेशिया, मलेशियातून पामतेलाची आयात करतो. याचबरोबर अर्जेंटिनातून सोयाबीन तेल आणि युक्रेन व रशियातून सूर्यफूल तेलाची आयात केली जाते.
हेही वाचाः गुंतवणूकदारांचा उत्साह वाढला; ‘बीएसई’चे एकत्रित बाजार भांडवल विक्रमी २९२ लाख कोटींपुढे
