PSU Bank Latest Fixed Deposit Rates: भारतात आजही गुंतवणूक करण्यासाठी बँकेत मुदत ठेवी ठेवण्यास पसंती दिली जाते. ज्येष्ठ नागरिकांसह अनेकजण मुदत ठेवींकडे सर्वात सुरक्षित गुंतवणूक म्हणून पाहतात. त्यामुळे सार्वजनिक क्षेत्रातील बँकेत (PSU) योग्य व्याज दर पाहून खातेदार मुदत ठेवींमध्ये गुंतवणूक करत असतात. त्यामुळेच बँकांनी जर व्याज दरात बदल केले तर गुंतवणूकदारांच्यादृष्टीने ते महत्त्वाचे असते. मागच्या दोन महिन्यात सार्वजनिक क्षेत्रातील बँकांनी त्यांच्या मुदत ठेवींवरील (Fixed Deposit) व्याज दरात बदल केले आहेत.
कोणत्या बँकांनी व्याज दरात बदल केले?
यूनियन बँक, बँक ऑफ इंडिया, पंजाब नॅशनल बँक आणि इतर बँकांनी ऑगस्ट महिन्यात आपल्या व्याज दरात बदल केले आहेत. यूनियन बँक आणि बँक ऑफ इंडियाने मुदत ठेवींवर सर्वाधिक म्हणजेच ३३३ दिवसांसाठी ७.४० टक्क्यांचा व्याज दर देऊ केला आहे. तर ज्येष्ठ नागरिकांसाठी (६० वर्ष आणि त्याहून अधिक) ०.५० टक्क्यांचा अधिकचा लाभ मिळणार आहे. तर अति ज्येष्ठ नागरिकांसाठी (८० वर्षांहून अधिक वय) ०.७५ टक्के अधिक व्याज मिळणार आहे, अशी माहिती इकॉनॉमिक टाइम्सने दिली आहे.
पैसाबाजारवर आलेल्या माहितीनुसार बँक ऑफ बडौदा ३९९ दिवसांसाठी ७.२५ टक्क्यांचा व्याज दर देत आहे. बँक ऑफ इंडिया ६६६ दिवसांसाठी ७.३ टक्के, बँक ऑफ महाराष्ट्र ७७७ दिवसांसाठी ७.२५ टक्के, कॅनरा बँक ४४४ दिवसांसाठी ७.२५ टक्के, सेंट्रल बँक ऑफ इंडिया ४४४ दिवसांसाठी ७.३ टक्के, इंडियन बँक ४०० दिवसांसाठी ७.२५ टक्के, इंडियन ओव्हरसिस बँक ४४४ दिवसांसाठी ७.३ टक्के, पंजाब नॅशनल बँक ४०० दिवसांसाठी ७.२५ टक्के, ६६६ दिवसांसाठी पंजाब अँड सिंध बँक ७.३ टक्के, स्टेट बँक ऑफ इंडिया ४४४ दिवसांसाठी ७.२५ टक्के आणि यूनियन बँक ३३३ दिवसांसाठी ७.४ टक्के व्याज दर देत आहे.
विशेष मुदत ठेव योजना
बँक ऑफ इंडियाकडून विशेष मुदत ठेवी योजनाही घोषित केल्या आहेत. यामध्ये दोन कोटी पर्यंतच्या ठेवीवर ६६६ दिवसांसाठी सामान्य खातेदारांना ७.३० टक्के, ज्येष्ठ नागरिकांना ७.८० टक्के आणि अति ज्येष्ठ नागरिकांना ७.९५ टक्के इतका व्याज दर मिळेल.
तर स्टेट बँक ऑफ इंडियाने “अमृत वृष्टी” या नावाने नवी मर्यादीत काळासाठीची मुदत ठेव योजना जाहीर केली आहे. या योजनेच्या माध्यमातून भारत आणि अनिवासी भारतीय खातेदारांसाठी अधिक व्याज दर देणाऱ्या योजना जाहीर केल्या आहेत. ही योजना १५ जुलै पासून सुरू झाली आहे. प्रत्यक्ष शाखेत जाऊन आणि इंटरनेट बँकिंग किंवा योनो बँकिंग ॲपद्वारे या ठेवींचा लाभ घेता येऊ शकतो.
© IE Online Media Services (P) Ltd