कॅनफिना घोटाळा

आज आपण जो घोटाळा बघणार आहोत तो वर्ष २००१ च्या प्रसिद्ध घोटाळ्यापेक्षा वेगळा आहे. ज्याची माहिती आपण पुढील काही भागांमध्ये घेऊ. हा घोटाळा घडला वर्ष १९९२ मध्ये पण त्याची शिक्षा वर्ष २००८ मध्ये सुनावली गेली. मात्र हाच निकाल लवकर लागला असता तर कदाचित वर्ष २००१ आणि त्याच्या आसपास जे गुन्हे केतन पारेखने घडवले ते घडलेही नसते. कॅनफिनाचा घोटाळा तसा फार सोपा होता आणि आज विचार केला तर अगदीच बाळबोध वाटेल अशी त्याची कार्यपद्धती होती.

हेही वाचा – शेअर बाजारातील तेजीला पूर्णविराम की तूर्त स्वल्पविराम?

हेही वाचा – तीन दिवसांच्या घसरणीनंतर आता शेअर बाजार सावरला, गुंतवणूकदारांच्या संपत्तीत ४ लाख कोटींची वाढ

बेंगळुरू स्थित कॅनरा बँक फायनान्शियल सर्व्हिसेस म्हणजे कॅनफिनामधून मुंबई स्थित कॅनरा बँक म्युच्युअल फंडामध्ये मोठी रक्कम पाठवण्यात आली. ही रक्कम सरकारी रोखे विकत घेण्यासाठी वापरण्यात येणार होती, पण झाले भलतेच की, ही रक्कम केतन पारेख आणि त्यांच्या साथीदारांच्या खात्यात वळवण्यात आली. केतन पारेखने रक्कम समभाग घेण्यात वापरली. मग वर्षा अखेरीस ती परत देखील केली. पण मधल्या काळात बरीच बोंबाबोंब झाली होती आणि पोलीस तपासदेखील सुरू झाला होता. सुमारे ४७ कोटी रुपये अशा पद्धतीने वळवण्यात आले होते. त्या वेळेला दुसऱ्याचे पैसे वापरून समभाग घ्यायचे आणि त्यातून नफा कमवायचा ही घोटाळेबाजांची पद्धत होती. केतन पारेख आणि त्यांच्या साथीदारांना या गुन्ह्यात सहा महिने आणि काहींना अधिक अशी शिक्षा झाली. बाळाचे पाय पाळण्यात दिसतात ते खरेच होते, कारण वर्ष २००१ मध्ये यापेक्षा कित्येक पटींनी मोठा घोटाळा उघडकीस येणार होता.

@AshishThatte

ashishpthatte@gmail.com

लेखक कॉस्ट अँड मॅनेजमेंट अकाउंटंट म्हणून कार्यरत आहेत.