Share Market LIVE Updates: १० वर्षांत पहिल्यांदाच नफा तरीही ‘या’ कंपनीच्या शेअर्सची किंमत ५ टक्क्यांनी घसरली

स्पाइसजेट कंपनीने तिसऱ्या तिमाहीत २६ कोटी रुपयांचा निव्वळ नफा नोंदवला असूनही, कंपनीच्या शेअर्सची किंमत ४% पेक्षा जास्त घसरली आहे. खरं तर, ब्रोकरेज हाऊस नुवामा इन्स्टिट्यूशनल इक्विटीजने स्पाइसजेटची टार्गेट प्राइज १४% ने कमी करून ५२ रुपये केली आहे.

अमेरिकेने केलेल्या टॅरिफ घोषणांमुळे गुरुवारी शेअर बाजाराच्या सुरुवातीलाच रुपयासह प्रमुख चलनांवर परिणाम झाल्याचे पाहायला मिळत आहे. अमेरिकेने केलेल्या ताज्या टॅरिफ घोषणांमुळे जागतिक बाजारपेठांना धक्का बसला असून, डॉलर मजबूत झाला आहे. आंतरबँक परकीय चलन बाजारात, रुपया ८७.२६ वर उघडला, नंतर अमेरिकन चलनाच्या तुलनेत ८७.४१ वर घसरला. मंगळवारी, अमेरिकन डॉलरच्या तुलनेत रुपया ४७ पैशांनी घसरून ८७.१९ वर स्थिरावला होता. बुधवारी, महाशिवरात्रीनिमित्त इक्विटी, फॉरेक्स, कमोडिटी बाजार बंद होते.

अल्ट्राटेक सिमेंटने केबल आणि वायर उद्योगात प्रवेश करण्याची योजना जाहीर केली आहे. त्यानंतर, अल्ट्राटेक सिमेंटच्या शेअरची किंमत ५.३% ने घसरून दिवसाच्या नीचांकी पातळीवर १०,३८१ रुपयांवर आली आहे.

आरबीआयने जोखीम भार कमी केल्यामुळे बँकिंग आणि एनबीएफसी कंपन्यांच्या शेअर्समध्ये मोठी वाढ झाली आहे. बंधन बँकेचा शेअर सर्वाधिक ७% वाढला असून, आरबीआय बँक देखील ४% वाढून व्यवहार करत आहे. एनबीएफसीमध्ये, एल अँड टी फायनान्स, चोला आणि श्रीराम फायनान्स ४ ते ५% वाढले आहेत.

गुरुवारी सकाळी देशांतर्गत वायदा बाजारात सोन्याच्या किमतीत घसरण झाली, अमेरिकन डॉलरची मजबूती आणि वाढत्या बाँड उत्पन्नामुळे सोन्याच्या किमती घसरल्या आहेत. गुडरिटर्न्सच्या मते, आज २४ कॅरेट सोन्याची किंमत प्रति ग्रॅम ८,७८१ रुपये आहे, तर २२ कॅरेट सोन्याची किंमत प्रति ग्रॅम ८,०४९ रुपये आहे. २२ कॅरेट सोन्याच्या १० ग्रॅमची किंमत ८०,४९० रुपये आहे, तर २४ कॅरेट सोन्याची किंमत ८७,८१० रुपये आहे. दरम्यान, १८ कॅरेट सोन्याची किंमत प्रति ग्रॅम ६,५८६ रुपये आहे, तर १० ग्रॅमची किंमत ६५,८६० रुपये आहे.

“आर्थिक वर्ष २०२५ मध्ये, आतापर्यंत, परदेशी संस्थात्मक गुंतवणूकदारांनी (FII) रोख बाजारात ३,८७,९७६ कोटी रुपयांचे शेअर्स विकले आहेत. विशेष म्हणजे, डीआयआयने ५,५५,५१९ कोटी रुपयांची खरेदी करून या विक्रीपेक्षा जास्त भरपाई केली आहे. असे असूनही, बाजार खाली घसरत आहे. यासह विविध घटकांमुळे बाजारावर परिणाम होण्याची शक्यता आहे. जीडीपी वाढ आणि कॉर्पोरेट कमाईतील चक्रीय मंदीमुळे बाजारतील मूलभूत तत्त्वे बिघडत आहेत,” असे जिओजित फायनान्शियल सर्व्हिसेसचे मुख्य गुंतवणूक धोरणकार डॉ. व्ही के विजयकुमार म्हणाले. याबाबत फायनान्शिअल एक्सप्रेसने वृत्त दिले आहे.

आज शेअर बाजार उघडल्यानंतर सेन्सेक्समधील सर्वाधिक वाढ झालेल्या कंपन्यांमध्ये इंडसइंड बँक, बजाज फायनान्स, बजाज फिनसर्व्ह, टाटा स्टील आणि एचडीएफसी बँक यांचा समावेश होता. दुसरीकडे, अल्ट्राटेक सिमेंट, पॉवरग्रिड, कोटक बँक आणि टेक महिंद्रा या कंपन्यांच्या शेअर्समध्ये घसरण झाल्याचे पाहायला मिळाले.

निफ्टी ५० मध्ये, पाच प्रमुख वाढ नोदंवणाऱ्या कंपन्यांमध्ये श्रीराम फायनान्स, बजाज फायनान्स, जेएसडब्ल्यू स्टील, इंडसइंड बँक आणि बजाज फिनसर्व्ह होते, तर अल्ट्राटेक सिमेंट, ग्रासिम, बजाज ऑटो, ट्रेंट आणि हिरो मोटोकॉर्प कंपनीचे शेअर्स सर्वाधिक घसरलेले होते.