रिझर्व्ह बँक ऑफ इंडिया (RBI) गेल्या काही महिन्यांपासून दावा न केलेल्या ठेवींचा लवकरात लवकर निपटारा करण्यासाठी प्रयत्नशील आहे. यात आता लोकांच्या सोयीसाठी RBI ने आतापर्यंत UDGAM (Unclaimed Deposits – Gateway to Access information) पोर्टलवर ३० बँकांचा समावेश केला आहे, जेणेकरुन लोकांना दावा केलेल्या आणि हक्क न केलेल्या ठेवी शोधण्यात मदत होणार आहे.
UDGAM पोर्टल ऑगस्टमध्ये सुरू करण्यात आले
RBI ने १७ ऑगस्ट रोजी UDGAM पोर्टल लाँच केले होते, जेणेकरून लोकांना त्यांची हक्क नसलेली ठेव रक्कम एकाच ठिकाणी शोधता येणार आहे. हे पोर्टल सुरू करताना सात बँकांचा समावेश करण्यात आला आहे. याशिवाय १५ ऑक्टोबरपर्यंत टप्प्याटप्प्याने आणखी बँकांचा त्यात समावेश करण्यात येणार आहे. एक प्रेस रिलीज जारी करत RBI ने म्हटले आहे की, २८ सप्टेंबर २०२३ पासून पोर्टलवर ३० बँकांसाठी शोध सुविधा उपलब्ध करून देण्यात आली आहे, ज्या मूल्याच्या दृष्टीने ठेवीदार शिक्षण आणि जागरूकता (DEA) निधीमध्ये समाविष्ट आहेत. दावा न केलेल्या ठेवींच्या ९० टक्क्यांपर्यंत रक्कम कव्हर केली जाते.
हेही वाचाः व्हेज थाळी १७ टक्क्यांनी झाली स्वस्त, CRISIL ने सांगितले ‘हे’ कारण
सर्व प्रमुख सरकारी आणि खासगी बँकांची नावे समाविष्ट
आरबीआयने सांगितले की, या पोर्टलवर आतापर्यंत सर्व प्रमुख सरकारी आणि खासगी बँकांची नावे समाविष्ट आहेत. या ३० बँकांमध्ये सार्वजनिक क्षेत्रातील सर्व प्रमुख बँका जसे की, SBI, बँक ऑफ बडोदा, पंजाब नॅशनल बँक, कॅनरा बँक आणि बँक ऑफ इंडिया आणि Citibank, Standard Chartered आणि HSBC सारख्या विदेशी बँकांचा समावेश आहे. खासगी क्षेत्रातील बँकांच्या यादीत HDFC बँक, ICICI बँक आणि Axis बँक यांची नावे समाविष्ट आहेत.
दावा न केलेली ठेव किती आहे?
आकडेवारीनुसार, फेब्रुवारी २०२३ पर्यंत १० वर्षे किंवा त्याहून अधिक काळ कार्यरत नसलेल्या सार्वजनिक क्षेत्रातील बँकांद्वारे सुमारे ३५,००० कोटी रुपये दावा न केलेल्या ठेवी आरबीआयकडे हस्तांतरित केल्या गेल्यात. SBI मधील सर्वाधिक हक्क न ठेवलेल्या ठेवी ८,०८६ कोटी रुपये आहेत. यानंतर पीएनबी ५,३४० कोटी, कॅनरा बँक ४,५५८ कोटी, बँक ऑफ बडोदा ३,९०४ कोटी आहे.
