Money Mantra : फंड विश्लेषण – पी.जी.आय.एम. इंडिया लार्ज कॅप फंड

• फंड घराणे – पी.जी.आय.एम. इंडिया म्युच्युअल फंड
• फंडाचा प्रकार – इक्विटी फंड
• एन. ए. व्ही. ( २ फेब्रुवारी २०२४ रोजी) ग्रोथ पर्याय – २९५ रुपये प्रति युनिट
• फंड मालमत्ता (३१ डिसेंबर २०२३ रोजी ) – ५३७ कोटी रुपये.
• फंड मॅनेजर्स – विनय पहारिया, ए आनंद पद्मनाभन, भूपेश कल्याणी.

फंडाची स्थिरता ( ३१ डिसेंबर २०२३ )

• पोर्टफोलिओ टर्नओव्हर ५४ %
• स्टॅंडर्ड डिव्हिएशन १३.५३ %
• बीटा रेशो ०.९२ %

पोर्टफोलिओ टर्नओव्हर म्हणजे एखाद्या फंड मॅनेजरने फंड योजनेमध्ये शेअरची सतत खरेदी विक्री खरेदी सुरू ठेवणे. जेवढे जास्त खरेदी विक्री व्यवहार घडतील तेवढाच फंडाचा खर्च वाढतो. पोर्टफोलिओ टर्नओव्हर जास्त असणे फारसे चांगले मानले जात नाही.

आणखी वाचा-Money Mantra: बजेट आणि आठवड्याचे बाजार गणित

स्टॅंडर्ड डिव्हिएशन म्हणजेच एखाद्या फंडाचा परतावा गेल्या तीन वर्षात किती स्थिर राहिला आहे त्याचे निर्दशक आहे. म्हणजेच दोन फंडाची तुलना करता ज्या फंडाचा हा आकडा कमी आहे तो फंड साधारणतः पुढील काळात दुसऱ्या फंडापेक्षा तसेच परतावे देण्याची शक्यता आहे उदाहरण घेऊया फंड X आणि फंड Y यांनी 12% परतावा मागच्या पाच वर्षात दिला आहे. जर स्टॅंडर्ड डिव्हिएशनचा फंड X चा आकडा Y पेक्षा कमी असेल तर फंड X पुढील काळात तसाच सर्वसाधारण परतावा देऊ शकतो तर, फंड Y मधून मिळणारा परतावा बदलू शकतो.

बीटा म्हणजेच गेल्या तीन वर्षात फंडाने दिलेल्या परताव्यावरून भविष्यात तो फंड किती वर किंवा खाली जाईल याचा अंदाज लावणे, जेवढी बीटा व्हॅल्यू कमी असेल तेवढाच फंड भरवशाचा.

शार्प रेश्यो म्हणजे अधिक रिटर्न्स मिळवण्यासाठी फंडाने किती जोखीम घेतली आहे, अधिकाधिक रिटर्न मिळवण्यासाठी फंड मॅनेजरने घेतलेली जोखीम अधिक असेल तर त्याचे प्रतिबिंब यामध्ये उमटते.

आणखी वाचा-Money Mantra: क्रेडिट कार्डाचे किती प्रकार असतात? 

तुमच्यासाठी हा फंड महत्त्वाचा का ?

३१ डिसेंबर २०२३ अखेरीस उपलब्ध आकडेवारीनुसार या फंड योजनेच्या पोर्टफोलिओमध्ये 35 शेअर्स आहेत. लार्ज कॅप म्हणजेच मोठ्या आकाराच्या १८० ते २०० कंपन्या असताना त्यातील निवडक ३५ कंपन्या आपल्या पोर्टफोलिओमध्ये असाव्यात हा फंड मॅनेजरचा कल स्पष्ट दिसतो.

कंपन्या निवडताना पोर्टफोलिओ टर्नओव्हर कमी ठेवावा आणि एकदा विकत घेतलेला शेअर दीर्घकाळपर्यंत ठेवून त्याचा फायदा मिळेल अशी योजना आखली जाते. फंड मॅनेजर पोर्टफोलिओ बांधणीपेक्षा शेअर निवडणे या प्रक्रियेला जास्त महत्त्व देतात.

रिटर्न ओव्हर इक्विटी इतरांपेक्षा जास्त असणे आणि सलग पाच वर्ष व्यवसाय कुठेही बाधित न होणे हे शेअर निवडण्याचे प्रमुख निकष आहेत.

मागच्या दहा वर्षांपैकी सात वर्षात कंपनीकडे कॅश फ्लो खेळता राहिला आहे ना ? याचा विचार फंड मॅनेजरकडून केला जातो.

बाजारामध्ये अचानकपणे मंदी आली तर पोर्टफोलिओची प्रतिकार करायची क्षमता असावी असे फंड मॅनेजरचे धोरण दिसते.

रिस्को मिटरचा विचार करायचा झाल्यास ‘Very High’ म्हणजेच सर्वाधिक जोखीम असलेल्या श्रेणीमध्ये हा फंड मोडतो.

आणखी वाचा-Money Mantra: फंड विश्लेषण: एच.एस.बी.सी. लार्ज कॅप फंड

२ फेब्रुवारी २०२४ रोजी फंडाचा परतावा (CAGR पद्धतीने)

• एक वर्ष – २१.१० %
• दोन वर्षे – ९.५५ %
• तीन वर्षे – ११.९२ %
• पाच वर्षे – १३.१८ %
• दहा वर्षे – १३.६८ %
• फंड सुरु झाल्यापासून – १७.४८ % फंडाने गुंतवणूक कुठे केली आहे ?

३१ डिसेंबर रोजी उपलब्ध पोर्टफोलिओनुसार आयसीआयसीआय बँक, एचडीएफसी बँक, रिलायन्स इंडस्ट्रीज, भारती एअरटेल, ॲक्सिस बँक, कोटक महिंद्रा बँक, टाटा कन्सल्टन्सी, बजाज फायनान्स आणि टायटन हे प्रमुख शेअर्स पोर्टफोलिओमध्ये आहेत.

पोर्टफोलिओमध्ये सर्वाधिक खाजगी बँका पंचवीस टक्के , सॉफ्टवेअर दहा टक्के, पेट्रोलियम साडेसहा टक्के, फार्मा कंपन्या सहा टक्के , एनबीएफसी सहा टक्के असे गणित बघायला मिळते.

जवळपास दहा टक्के शेअर्स मिडकॅप कंपन्यांचे आहेत यावरून जोखीम घेण्याचा पवित्रासुद्धा स्पष्ट होतो. मागच्या महिन्याभराच्या काळात हवेल्स इंडिया आणि झोमॅटो हे दोन शेअर्स पोर्टफोलिओमध्ये नव्याने दाखल झाले आहेत तर आयशर मोटर्स मधून कंपनीने आपली गुंतवणूक काढून घेतली आहे.

आणखी वाचा-Money Mantra : अर्थसंकल्पातून गुंतवणूकदारांना काय मिळणार ?

‘एस.आय.पी.’तील दीर्घकालीन परतावे

तुम्ही या फंडात दरमहा एक हजार रुपयांची गुंतवणूक केली असती तर

• एक वर्षापासून एसआयपी केली असती तर २४.०६ %
• दोन वर्षे १७.३२ %
• तीन वर्षे १३.१३ %
• पाच वर्षे १४.७६ %
• सलग दहा वर्ष ११.९७ %

असा स्थिर परतावा मिळालेला दिसतो.

नुकत्याच एका निर्णयाद्वारे फंड घराण्यांनी जाहिरात करताना दहा वर्षाच्या सरासरी रिटर्नचा (CAGR) समावेश त्यात करावा अशी मार्गदर्शक सूचना करण्यात आली. त्यानुसार निवडक फंडांचे विश्लेषण या लेखमालिकेतून केले जात आहे. फंड योजनेत गुंतवणूक करावी असा सल्ला देणे हा या लेखमालिकेचा उद्देश नाही. या फंडात गुंतवणूक करताना सर्व जोखीम विषयक माहिती वाचून आपल्या जबाबदारीवरच गुंतवणूक करावी.