भारतातील श्रीमंत आणि अतिश्रीमंत व्यक्ती त्यांचा पैसा कुठे गुंतवत आहेत?

भारतात २०२४ च्या सुरुवातीला अतिश्रीमंतांची संख्या २.१८ लाख एवढी होती. जी २०२८ पर्यंत ४.३० लाख पर्यंत वाढण्याची शक्यता आहे.

विदेशात वाढती गुंतवणूक

अतिश्रीमंत व्यक्ती विदेशातही गुंतवणूक (Global Allocations) करण्यास प्राधान्य देत आहेत. यासाठी अमेरिकेला पसंती देण्यात येत असून त्यानंतर युके, सिंगापूर, संयुक्त अरब अमिराती यांचा क्रमांक लागतो. LRS ची (लिबरलाइज्ड रेमिटन्स स्कीम) वाढलेली मर्यादा, अनुकूल नियम आणि धोरणे, त्याशिवाय बदलत्या जागतिक घडामोडी या घटकांमुळे जागतिक बाजारपेठेत गुंतवणूक करण्यासाठी अनुकूल परिस्थिती निर्माण झाली आहे.

अहवालासाठीच्या मुलाखतीमध्ये सहभागी झालेल्या ५८ टक्के लोकांनी सांगितले की, जागतिक बाजारपेठेत चांगल्या परताव्याची अपेक्षा असल्यामुळे ते त्याठिकाणी पैसे गुंतवत आहेत. पोर्टफोलियोमध्ये विविधता आणण्यासाठी ४९ टक्के आणि व्यवसाय करण्याची सुलभता असल्यामुळे ४० टक्के लोक विदेशात गुंतवणूक करत आहेत.

जागतिक गुंतवणूकदारांपैकी ४७ टक्के गुंतवणूकदार निवासी रिअल इस्टेटमध्ये गुंतवणुकीस प्राधान्य देत आहेत. तर जागतिक इक्विटीमध्ये (४२ टक्के) म्युच्युअल फंडात (४२ टक्के) यांना प्राधान्य दिले जात आहे.

रिअल इस्टेटमधील गुंतवणूक वाढली

इक्विटीजनंतर रिअल इस्टेटला श्रीमंतानी अधिक पसंती दिलेली दिसते. अतिश्रीमंताच्या गुंतवणूक पोर्टफोलियोमध्ये व्यावसायिक आणि निवासी रिअल इस्टेटमध्ये अधिक गुंतवणूक केल्याचे दिसते.

कोटक महिंद्रा बँकेच्या बँकिंग विभागाचे सीईओ ओईशर्य दास म्हणाले की, आमच्या अहवालातून असे दिसून येते की, श्रीमंत आणि अतिश्रीमंत व्यक्ती त्यांच्या पोर्टफोलियो आणि गुंतवणुकीत विविधता आणू पाहत आहेत. यासाठी ते विदेशातही मोठ्या प्रमाणावर गुंतवणूक करत आहेत. त्यामुळे २०२८ मध्ये त्यांच्याकडून मोठ्या प्रमाणात खर्च होण्याची शक्यता आहे.