Success Story: देशाच्या सीमा आणि देशातील नागरिकांचे शत्रूपासून रक्षण करणे हे भारतीय लष्कराचे (Indian Army) प्रमुख कर्तव्य आहे. भूदल, नौदल आणि वायूदल या तीन सेनांचा समावेश भारतीय लष्करामध्ये होतो. भारतातील अनेक तरुणांचे लष्करात जाण्याचे स्वप्न असते. त्यासाठी काही जण लहानपणापासूनच खूप मेहनत घेतात. या मेहनतीच्या काळात त्यांचे कुटुंबीयही त्यांची साथ देताना दिसतात. आज आम्ही नुकत्याच लष्करात आर्मी ऑफिसर झालेल्या तरुणाचा प्रेरणादायी प्रवास सांगणार आहोत.
शनिवारी इंडियन मिलिटरी अकादमी (IMA) येथे पासिंग आऊट परेड पार पडली. यावेळी देशसेवेची तळमळ असलेल्या अनेक सामान्य कुटुंबातील तरुणांचे स्वप्न साकार होताना दिसले. त्यापैकी एक तरुण तब्बल १२ व्या प्रयत्नात सीडीएस उत्तीर्ण होऊन तो आर्मी ऑफिसर झाला. या तरुणाचे नाव दीपक सिंग बिश्त असून तो रानीखेत, उत्तराखंडचा रहिवासी आहे.
लष्करात लेफ्टनंट झालेला दीपक सिंग बिश्त हा मूळचा अल्मोडा जिल्ह्यातील बागवालीपोखर रानीखेतचा रहिवासी आहे. त्याचे वडील दिल्लीत ढाबा चालवतात. त्याचे सुरुवातीचे शिक्षण महातगाव येथील प्रिन्स पब्लिक स्कूलमधून झाले. त्यानंतर तो आपल्या आई-वडिलांबरोबर दिल्लीला आला आणि सूरजमल विहार येथील प्रतिभा विकास विद्यालयमधून इंटरमिजिएट पास झाला.
सीडीएसमध्ये झाला तब्बल १० वेळा नापास
दीपक सिंग बिश्तने शिक्षणादरम्यान NCC मध्ये प्रवेश घेतला होता. इथूनच त्याने आर्मी ऑफिसर बनण्याची स्वप्ने पाहिले. तो सीडीएसमध्ये तब्बल १० वेळा नापास झाला. त्याची ११व्यांदा हवाई दलात निवड झाली, पण त्याला सैन्यात भरती होण्याचा इच्छा होती, त्यामुळे तो पुन्हा एकदा सीडीएसमध्ये रुजू झाला. शेवटी त्याची १२ व्या वेळी लष्करात निवड झाली. या ट्रेनिंग काळात दीपकने गरीब मुलांची शिकवणी घेतली होती.
मुलाला गणवेशात पाहून आई-बाबांच्या डोळ्यात अश्रू तरळले
पासिंग आऊट परेडनंतर जेव्हा दीपक सिंग बिश्त त्याची आई गीता देवी बिश्त आणि वडील राजेंद्र सिंह बिश्त यांना भेटला, तेव्हा आपल्या मुलाला गणवेशात पाहून दोघांच्याही डोळ्यात अश्रू आले होते.
