success story of Kanishak Kataria : केंद्रीय लोकसेवा आयोगाची (यूपीएससी) परीक्षा ही भारतातील सर्वात कठीण परीक्षांपैकी एक आहे. दरवर्षी परीक्षा देणाऱ्या असंख्य इच्छुकांसह यात पास होणे ही कोणतीही छोटी कामगिरी नाही. पण, काही जणांना स्वतःवर विश्वास असला की प्रत्येक टप्पा पार करून ते परीक्षा क्रॅक करतात. तर आज आपण कनिष्क कटारियाच्या प्रेरणादायी यशोगाथेबद्दल (Success Story) जाणून घेणार आहोत. कारण धडपडणाऱ्या, वेगळे काही करू पाहणाऱ्या तरुणांसाठी तो एकेकाळी प्रतीक ठरला होता.
आयएएस अधिकारी कनिष्क कटारिया, मूळचा राजस्थानमधील जयपूरचा आहे. केंद्रीय लोकसेवा आयोगाच्या सिव्हिल सर्व्हिस परीक्षेत कनिष्क कटारिया देशात पहिला आला (Success Story). पहिल्याच प्रयत्नात त्याने यूपीएससी सिव्हिल सर्व्हिसेस (CSE) परीक्षा उत्तीर्ण केली आणि ऑल इंडिया रँक (AIR) 1 मिळवला. यानंतर राजस्थानमधील भरतपूर येथील विभागीय आयुक्त पदावरून निवृत्त झाल्यानंतर आयएएस अधिकारी कनिष्क कटारिया याने त्यांच्या वडिलांच्या राजीनाम्याच्या आदेशावर स्वाक्षरी केली. दरम्यान, त्यांचे वडील यावर्षी ३० सप्टेंबर २०२५ रोजी सेवानिवृत्त झाले.
वर्षाला १ कोटी पॅकेज (Success Story)
केंद्रीय लोकसेवा आयोगाच्या (UPSC) २०१९ सीएसई परीक्षेत ऑल इंडिया रँक १ मिळविल्यानंतर कनिष्क कटारिया प्रशासकीय सेवेतील एक प्रसिद्ध व्यक्तिमत्त्व आहे. हे लक्षात घेणे मनोरंजक आहे की, त्याने एका आकर्षक डेटा सायन्स जॉब ऑफरचा त्याग केला होता, ज्यामध्ये वर्षाला एक कोटी पॅकेज दिले जाणार होते. कटारिया याने संगणक शास्त्राचा अभ्यास केला आणि आयआयटी बॉम्बेमधून पदवी प्राप्त केली, तेव्हा त्याला दक्षिण कोरियामध्ये सॅमसंगसोबत काम करण्याची ऑफर मिळाली होती.
पण, कनिष्क कटारियाला देशाची सेवा करण्याची आवड असल्याने त्याने वेगळा मार्ग निवडण्याचे ठरवले. यूपीएससीच्या तयारीसाठी तो २०१७ मध्ये जयपूरला परतला. कनिष्क कटारियाचे वडील एक आयएएस अधिकारीदेखील होते, यांनी देशातील सर्वात नामांकित परीक्षेत कनिष्क कटारियाला उत्कृष्ट कामगिरी करण्यास प्रवृत्त केले. शिवाय, त्याने यासाठी कोणतेही कोचिंगसुद्धा घेतले नाही. त्याऐवजी त्याने केवळ वेळापत्रकांसह स्वतः अभ्यास केला. कटारियाने २०१९ मध्ये परीक्षा दिली आणि त्याच्या अथक प्रयत्नांमुळे तो आज आयएएस अधिकारी झाला आहे.
