एपी, जकार्ता : इंडोनेशियाची राजधानी जकार्ता येथे रविवारी एका इंधन साठय़ास मोठी आग लागली. या दुर्घटनेत १९ जण मृत्युमुखी पडले. अद्याप तीन जण बेपत्ता आहेत. उशिरापर्यंत त्यांचा शोध सुरू होता. उत्तर जकार्तामधील तानाह मेराह भागातील दाट लोकवस्तीजवळ सरकारी तेल आणि वायू कंपनी ‘पेर्टामिना’संचालित ‘प्लम्पांग इंधन डेपो’ आहे. ते इंडोनेशियाची २५ टक्के इंधनाच्या गरज या साठय़ाद्वारे पुरवली जाते. अग्निशमन दलाच्या अधिका-यांनी सांगितले की, दोन तासांहून अधिक काळ शेजारच्या परिसरात आग आटोक्यात आणण्यासाठी शुक्रवारी मध्यरात्रीपूर्वी सुमारे २६० अग्निशमन दल जवान आणि ५२ अग्निशमन दल यंत्रणांची मदत घेण्यात आली. या दुर्घटनेच्या चित्रफितीत शेकडो नागरिक घाबरून पळत असल्याचे दिसत होते. दाट काळय़ा धुराचे लोट व ज्वाळांनी आकाश व्यापले होते. इंडोनेशियाचे अध्यक्ष जोको विडोडो यांनी रविवारी सकाळी दुर्घटनाग्रस्त भागास भेट देऊन गरजूंना सरकारी मदतीचे आश्वासन दिले. त्यांनी सांगितले, की त्यांनी संबंधित मंत्री व जकार्ता प्रांतपालांना इंधन साठय़ापासून परिसरातील रहिवाशांना हलवण्याचे अथवा हा इंधन साठा स्थलांतरित करण्याचे आदेश दिले आहेत. इंधनाचा दाब वाढल्याने समस्या राष्ट्रीय पोलीस प्रमुख जनरल लिस्टो सिजिट प्राबोवो यांनी सांगितले, की पश्चिम जावा प्रांतातील बालोंगन शुद्धिकरण प्रकल्पातून मिळणाऱ्या इंधनाच्या दाब वाढल्याने तांत्रिक समस्या निर्माण होऊन ही आग लागली. ‘डेपो’जवळ राहणाऱ्या रहिवाशांनी सांगितले की त्यांना पेट्रोलचा तीव्र वास येत होता, ज्यामुळे काही जणांना उलटय़ा झाल्या. त्यानंतर दोनदा मोठा गडगडाटासारखा आवाज होऊन मोठा स्फोट झाला.