‘तो’ गाणी ऐकण्यात गुंग असताना मागून ट्रेन आली आणि…..

कानाला इअर फोन लावून गाणी ऐकण्यात गुंग झालेल्या एका २० वर्षीय युवकाचा ट्रेन खाली येऊन मृत्यू झाला. मध्य प्रदेशातील सुखी सिवानीया भागात ही दुर्देवी घटना घडली. सुनील यादव असे मृत तरुणाचे नाव असून तो भाडभाडा गावात रहायला होता. बुधवारी सुनील नेहमीप्रमाणे आपल्या गुरांना घेऊन रेल्वे रुळानजीकच्या परिसरात गेला होता. त्यावेळी ट्रेन खाली येऊन त्याचा मृत्यू झाला.

पोलीस घटनास्थळी पोहोचले तेव्हा सुनीलचा मृतदेह रुळावर पडलेला होता. त्याच्या कानामध्ये इअरफोन होते. सुनील नेहमीच रेल्वे रुळालगतच्या परिसरात गुरांना चरण्यासाठी घेऊन जायचा असे तपास अधिकारी भानू प्रताप यांनी सांगितले. बुधवारी सकाळी अकराच्या सुमारास तो घरातून निघाला होता. गाणी ऐकण्यात गुंग झाल्यामुळे त्याला ट्रेनचा अंदाज आला नाही आणि ट्रेन खाली येऊन त्याचा मृत्यू झाला.