22 Year Old Man Dies In Cricket Match: मध्य प्रदेशातील खरगोन येथे शनिवारी संध्याकाळी २२ वर्षीय तरुणाचा हृदयविकाराच्या तीव्र झटक्याने मृत्यू झाल्याचे वृत्त आहे. क्रिकेटच्या सामन्यात खेळत असतानाच या तरुणाला हृदयविकाराचा झटका आला होता. अधिकाऱ्यांच्या माहितीनुसार, बलवाडा पोलीस ठाण्याच्या हद्दीतील कटकूट गावात गोलंदाजी करताना इंदलसिंग जाधव बंजारा यास हृदयविकाराचा झटका आला.बंजारा याला त्वरीत रुग्णालयात नेण्यात आले, परंतु हॉस्पिटलमध्ये पोहोचताच त्याला मृत घोषित करण्यात आले, असे बडवाह सिव्हिल हॉस्पिटलमधील डॉ. विकास तलवारे यांनी सांगितले. शवविच्छेदन तपासणीत मृत्यूचे कारण हृदयविकाराचा झटका आढळून आला. तपासणीनंतर त्याचा मृतदेह कुटुंबीयांच्या ताब्यात देण्यात आल्याचे डॉ.तलवारे यांनी नमूद केले.
बंजाराला रुग्णालयात नेणाऱ्या साक्षीदारांच्या म्हणण्यानुसार, त्याने सामन्यादरम्यान छातीत दुखत असल्याची तक्रार केली होती. पीटीआयच्या अहवालात शालिग्राम गुर्जर, या स्थानिक ग्रामस्थांनी सांगितले की, इंदलसिंग हा बरखड तांडा गाव संघाकडून खेळत होता, ज्याने प्रथम फलंदाजी करताना ७० धावा केल्या. संघ गोलंदाजी करत असताना बंजाराने छातीत दुखत असल्याचेही सांगितले, त्यानंतर त्याने काही वेळ झाडाखाली विश्रांती घेतली. संघाच्या विजयानंतर त्याने आपल्या सहकाऱ्यांना जवळच्या रुग्णालयात नेण्यास सांगितले. मात्र हॉस्पिटलमध्ये जात असताना वाटेतच त्याचे निधन झाले.
हे ही वाचा<< छातीत फक्त जळजळ होतेय की हार्टअटॅक आलाय? लक्षण कसे ओळखाल, फक्त डाव्या बाजूला दुखणं नव्हे तर..
दरम्यान, यापूर्वी मागील वर्षी आठवीतील एका विद्यार्थ्याचा क्रिकेट खेळताना हृदयविकाराच्या धक्क्याने मृत्यू झाल्याची दुर्देवी घटना पुण्याच्या वानवडी भागात घडली होती. अवघ्या १४ वर्षाचा हा चिमुकलासकाळी मित्रांबरोबर क्रिकेट खेळायला गेला होता. क्रिकेट खेळत असताना त्याच्या छातीत दुखू लागल्याने त्याने वडिलांशी संपर्क साधला.रुग्णालयात जाण्याआधी तो बेशुद्ध पडला होता. उपचारांपूर्वीच त्याचा मृत्यू झाला होता. अशाप्रकारचा हृदयविकाराचा झटका हा कार्डियाक अरेस्टप्रमाणे अगदी तीव्र स्वरूपात येण्याचा धोका असतो. अचानक केलेला व्यायाम, धावपळ, ताण व बदलती जीवनशैली या धोक्याला कारण ठरते.
