दिल्लीतील सफदरजंग परिसरात एक धक्कादायक घटना उघडकीस आली आहे. व्यवसायाने फॅशन डिझायनर असलेली २६ वर्षीय तरुणी गुरुवारी सकाळी दिल्लीतील सफदरजंग एन्क्लेव्ह येथील घरात मृतावस्थेत आढळून आली. संबंधित तरुणीचं नाव दीपिका असल्याची माहिती मिळत आहे. ही घटना उघडकीस आल्यानंतर पोलिसांनी घटनास्थळी धाव घेतली आहे.
पोलिसांनी घटनास्थळाची प्राथमिक तपासणी केल्यानंतर मृत तरुणीचा मृतदेह शवविच्छेदनासाठी एम्सच्या ट्रॉमा सेंटरमध्ये पाठवला आहे. २६ वर्षीय फॅशन डिझायनर तरुणीने आत्महत्या केली की मृत्यूचं वेगळं काही कारण आहे, याबाबतची अधिकृत माहिती अद्याप समोर आली नाही. पीडित तरुणीने आत्महत्या केली असावी, असा प्राथमिक अंदाज पोलिसांकडून वर्तवण्यात येत आहे.
हेही वाचा- Manipur Horror: दोन महिलांना नग्न करत काढली धिंड, सामूहिक बलात्काराचा आरोप
‘इंडिया टुडे’नं दिलेल्या वृत्तानुसार, स्थानिक पोलीस मृत तरुणीच्या कुटुंबीयांचीही चौकशी करत आहेत. सुसाईड नोट सापडली आहे की नाही? हे अद्याप स्पष्ट झालं नाही. पोलिसांकडून मृत्यूच्या नेमक्या कारणाचा शोध घेतला जात आहे.
