Tahawwur Rana Extradiction : २००८ च्या मुंबई दहशतवादी हल्ल्याचा सूत्रधार असल्याचा आरोप असलेला तहव्वुर राणा लवकरच भारतात परतणार असल्याचं चित्र आहे. कारण, प्रत्यार्पणाला स्थगिती देण्याचा देण्याचा त्याचा अर्ज अमेरिकेच्या सर्वोच्च न्यायालयाने फेटाळल्यानंतर भारताने तत्काळ पावलं उचलत त्याला भारतात आणण्याकरता उपाययोजना आखल्या. इंडियन एक्स्प्रेसने सूत्रांच्या हवाल्याने दिलेल्या वृत्तानुसार, तहव्वूर राणाला भारतात आणण्याकरता राष्ट्रीय तपास संस्थेचे (एनआयए) तीन वरिष्ठ अधिकारी अमेरिकेत पोहोचले आहेत.
महानिरीक्षक दर्जाचे अधिकारी आशिष बत्रा यांच्या नेतृत्वाखालील तीन सदस्यीय एनआयए पथकात उपमहानिरीक्षक दर्जाचे अधिकारी जया रॉय आणि एक उपअधीक्षक दर्जाचे अधिकारी यांचा समावेश आहे. सूत्रांनी सांगितले की, ‘सरेंडर वॉरंट’ मिळाल्यानंतर अधिकारी रविवारी अमेरिकेला रवाना झाले.
इंडिया टुडेने दिलेल्या वृत्तानुसार, दिल्ली आणि मुंबईतील दोन तुरुंगांमध्ये कडक सुरक्षा व्यवस्था ठेवण्यात आली आहे. कारण, भारतात आल्यानंतर राणाला चौकशीसाठी राष्ट्रीय तपास संस्थेच्या (एनआयए) कोठडीत ठेवण्यात येणार आहे. दरम्यान, इंडियन एक्स्प्रेसने दिलेल्या वृत्तानुसार, सूत्रांनी दिलेल्या माहितीनुसार, राणाला चौकशीसाठी दिल्लीतील एनआयएच्या मुख्यालयात ठेवण्यात येणार आह. येथे सुरक्षा व्यवस्था वाढवण्यात आली आहे. “तिहार तुरुंग प्रशासनाशी कोणताही औपचारिक संपर्क झालेला नाही, परंतु त्यांनी त्यांच्या सेलचे सुरक्षा मूल्यांकन देखील सुरू केले आहे; ते त्याला उच्च-सुरक्षा वॉर्डमध्ये ठेवण्याची शक्यता आहे. त्याच्या सेलमध्ये सीसीटीव्ही कॅमेरे असतील, त्यात बाथरूमची सुविधा असेल आणि ते त्याच्या हालचालींवर २४ तास लक्ष ठेवतील”, असे सूत्रांनी सांगितले.
तहव्वूर राणावर कोणते आरोप आहेत?
राणा हा पाकिस्तानी वंशाचा कॅनेडियन व्यापारी आहे आणि तो लष्कर-ए-तैयबा (एलईटी) या दहशतवादी संघटनेचा सक्रिय कार्यकर्ता आहे. मुंबईवरील हल्ल्यापूर्वी येथील संभाव्य लक्ष्यांची टेहाळणी (रेकी) करण्याची जबाबदारी डेव्हिड कोलमन हेडली ऊर्फ दाऊद सैयद गिलानीवर सोपवण्यात आली होती. कोणाला संशय येऊ नये त्यासाठी डेव्हिड हेडलीचा मुंबई दौरा व्यावसायिक कामासाठी दाखवण्यात आला होता. त्यात राणाचा मोठा सहभाग आहे. राणाचा ‘इमिग्रेशन’ व्यवसाय होता. त्याचाच आधार घेऊन त्याच्या कंपनीची एक शाखा मुंबईतील ताडदेव परिसरात सुरू होत असल्याचे चित्र निर्माण करण्यात आले. त्यासाठी मुंबईत एक इमिग्रेशन सेंटर उभे करण्यात आले. त्याच्याच कामासाठी हेडली मुंबईत यायचा. यावेळी त्याने अनेक संवेदनशील ठिकाणांची रेकी केल्याचा आरोप आहे. हेडलीने याच इमिग्रेशन सेंटरचा कर्मचारी म्हणून व्हिजिटिंग कार्डे छापली होती. पण सुरक्षा यंत्रणांच्या तपासात या इमिग्रेशन सेंटरमध्ये इमिग्रेशन, व्हिजा अथवा इतर कोणतेही काम झाल्याचे आढळले नाही. एनआयएने या प्रकरणी २५ डिसेंबर २०११ रोजी आरोपपत्र दाखल केले होते. त्यातून अनेक खळबळजनक माहिती उघड झाली होती.
अमेरिकेच्या सर्वोच्च न्यायालयाने तहव्वुर राणाचा भारतात प्रत्यार्पणाला स्थगिती देण्याची विनंती करणारा अर्ज फेटाळून लावला. अमेरिकेत शिक्षा झाल्यानंतर तो बराच काळ एंजेलिसमधील मेट्रोपॉलिटन डिटेन्शन सेंटरमध्ये होता.