Latest Marathi News- Breaking News Today | Read Marathi Batmya from Maharashtra, India ब्रेकींग मराठी न्यूज at https://loksatta.com/

अनिवासी भारतीय व भारतीय वंशाच्या लोकांचे पंधरावे प्रवासी भारतीय अधिवेशन वाराणसीत सुरू झाले, त्या वेळी ते बोलत होते.

(संग्रहित छायाचित्र)

वाराणसीत पंधरावे प्रवासी अधिवेशन सुरू

यापूर्वीच्या सरकारच्या काळात लूट सुरू होती पण भाजपने सत्तेवर आल्यानंतर साडेचार वर्षांत ८५ टक्के लूट थांबवली आहे, असे पंतप्रधान नरेंद्र मोदी यांनी सांगितले. अनेक वर्षे सत्तेवर असलेल्या पक्षाने भ्रष्टाचार थांबवण्यासाठी काहीच प्रयत्न केले नाहीत, अशी टीका त्यांनी काँग्रेसला उद्देशून केली.

माजी पंतप्रधान राजीव गांधी यांचा नामोल्लेख टाळून ते म्हणाले, की पूर्वी केंद्राने दिलेल्या १ रुपयापैकी १५ पैसे लोकांपर्यंत पोहोचत होते पण ही गळती थांबवण्यासाठी काँग्रेसने काहीच केले नाही. लोकांपर्यंत १५ पैसेच पोहोचतात असे विधान पूर्वी राजीव गांधी यांनी केले होते.

मोदी म्हणाले, की आमच्या सरकारने विविध योजनातून ५,८०,००० कोटी रुपये थेट हस्तांतरित केले. अनिवासी भारतीय व भारतीय वंशाच्या लोकांचे पंधरावे प्रवासी भारतीय अधिवेशन वाराणसीत सुरू झाले, त्या वेळी ते बोलत होते.

अनिवासी भारतीय हे देशाचे खरे राजदूत असून तेच देशाच्या क्षमतेचेही प्रतीक आहे, भारत बदलू शकत नाही ही मनोवृत्ती आम्ही बदलली आहे, असे ते म्हणाले. या वेळी मॉरिशसचे पंतप्रधान प्रविंद जगन्नाथ, परराष्ट्रमंत्री सुषमा स्वराज, उत्तर प्रदेशचे मुख्यमंत्री आदित्यनाथ, हरयाणाचे मुख्यमंत्री मनोहरलाल खट्टर , उत्तराखंडचे मुख्यमंत्री त्रिवेंद्रसिंह रावत, उत्तर प्रदेशचे राज्यपाल राम नाईक, परराष्ट्र राज्य मंत्री व्ही.के. सिंह उपस्थित होते.

भारताच्या विविध पातळ्यांवरील कामाची दखल जगात घेतली जात आहे. त्यात पर्यावरण क्षेत्रातील कामगिरीचा समावेश आहे, असे मोदी यांनी स्पष्ट केले.

काँग्रेसवर टीका करताना ते म्हणाले, की त्यांना रोग माहिती होता (भ्रष्टाचार), तो मान्यही होता. पण हा रोग बरा करण्यासाठी त्यांनी कधीच विचार केला नाही. काँग्रेसने देशावर अनेक वर्षे राज्य केले पण भ्रष्टाचाराने किडलेली यंत्रणा त्यांनी देशाला दिली, हे तत्कालीन पंतप्रधानांनीही मान्य केले होते पण नंतरच्या १०-१५ वर्षांतही काँग्रेसने त्यावर काहीच केले नाही. पैशांची गळती भ्रष्टाचारामुळे सुरूच राहिली. मध्यमवर्गीय लोक प्रामाणिकपणे कर भरत राहिले व ८५ टक्के लूट सुरू राहिली. ही ८५ टक्के लूट आम्ही तंत्रज्ञानाचा वापर करून थांबवली. साडेचार वर्षांत ५ लाख ८० हजार कोटी रुपये विविध योजनांतून थेट हस्तांतर करण्यात आले. ते थेट बँक खात्यात गेल्याने मधल्यामधे लूट करणाऱ्यांना तसे करता आले नाही. जर काँग्रेसनेच चालवलेली पद्धत सुरू ठेवली असती, तर यातील ४ लाख ५० हजार कोटी रुपये मधल्यामधे हडप झाले असते. सरकारी योजनांचा लाभ घेणारे ७ कोटी खोटे लाभार्थी आम्ही शोधून काढले जे केवळ कागदावर अस्तित्वात होते, त्यामुळेही बरीच गळती कमी झाली.

First published on: 23-01-2019 at 02:17 IST

Web Title: 85 percent of the looted congress robbery with the help of technology modi

काँग्रेसच्या काळातील ८५ टक्के लूट तंत्रज्ञानाच्या मदतीने थांबवली – मोदी