समान नागरी कायद्याबाबत सध्या देशभर चर्चा सुरू आहे. पंतप्रधान नरेंद्र मोदींनी समान नागरी संहितेवर (यूसीसी) उघडपणे भाष्य करायला सुरुवात केल्यापासून हा आता देशातला सर्वात चर्चिला जाणारा मुद्दा बनला आहे. दरम्यान, या मुद्द्यावर आता मोदी सरकारला मोठं समर्थन मिळालं आहे. आम आदमी पार्टीचे सरचिटणीस संदीप पाठक यांनी सांगितलं की, समान नागरी संहितेचं आम्ही तत्वतः समर्थन करत आहोत.
आपचे सरचिटणीस संदीप पाठक म्हणाले, कलम ४४ देखील असं म्हणतं की, देशात यूसीसी (यूनिफॉर्म सिव्हिल कोड) असायला हवा. परंतु आमच्या आम आदमी पार्टीला असं वाटतं की, या मुद्द्यावर देशातील सर्व धर्म आणि राजकीय पक्षांशी चर्चा व्हायला हवी. सर्वांच्या संमतीनंतरच त्याची अंमलबजावणी व्हायला हवी.
एकीकडे आम आदमी पार्टीने यूसीसीचं तत्वतः समर्थन केलं असलं तरी भाजपा आणि पंतप्रधान नरेंद्र मोदींवर निशाणा साधला आहे. संदीप पाठक म्हणाले, जेव्हा जेव्हा निवडणुका येतात तेव्हा तेव्हा भारतीय जनता पार्टी असे क्लिष्ट (किचकट) आणि गुंतागुंतीचे मुद्दे घेऊन येते.
हे ही वाचा >> ३३ वर्षांपूर्वी खून, न्यायालयीन खटल्यादरम्यान फरार, तब्बल २७ वर्षांपासून गुंगारा देणारी महिला अखेर पोलिसांच्या जाळ्यात
भाजपाच्या प्रचाराची दिशा ठरली?
‘एकाच कुटुंबातील सदस्यांना वेगवेगळे नियम लागू होत नाहीत मग, दोन वेगवेगळय़ा कायद्यांनुसार देश कसा चालेल,’ असा प्रश्न उपस्थित करत पंतप्रधान नरेंद्र मोदी यांनी मंगळवारी देशात समान नागरी कायदा लागू करण्याचे स्पष्ट शब्दांत समर्थन केले. लोकसभा निवडणुकीच्या जवळपास वर्षभर आधी भाजपच्या प्रचाराची दिशा स्पष्ट केली आहे. भोपाळमधील ‘मेरा बूथ सबसे मजबूत’ या कार्यक्रमात भाजप कार्यकर्त्यांच्या प्रश्नांना उत्तरे देताना मोदी यांनी २०२४ च्या लोकसभा निवडणुकीतील भाजपाचा अजेंडा उलगडून सांगितला.
