दिल्लीत भाजपला रोखण्यासाठी ‘आप’चे प्रयत्न

दिल्लीत गैरमार्गाने सरकार स्थापन करण्यापासून भाजपला रोखण्यासाठी आम आदमी पार्टीने (आप) प्रयत्न सुरू केले आहेत. काँग्रेस, जद(यू) आणि भाजपचे काही ‘प्रामाणिक’ आमदार आमच्या संपर्कात आहेत, असे आपने म्हटले आहे. भाजपने आपच्या ५ आमदारांशी संपर्क साधला होता, त्या स्टिंग ऑपरेशनची फीत आपल्याकडे आहे आणि गरज भासल्यास आपण आणखीही काही फिती उपलब्ध करू देऊ, असा दावा आपचे नेते अरविंद केजरीवाल यांनी येथे एका पत्रकार परिषदेत केला. नव्याने निवडणुका व्हाव्या अशी पक्षाची इच्छा आहे, असे ते म्हणाले. बुधवारी राज्यपालांची भेट घेणार असून त्यांना स्टिंग ऑपरेशनची सीडी देणार असल्याचे केजरीवाल म्हणाले.
‘सरकार स्थापनेबाबत १० ऑक्टोबपर्यंत भूमिका स्पष्ट करा’
दिल्लीत सरकार स्थापन करण्यासाठी नायब राज्यपाल नजीब जंग यांनी राष्ट्रपती प्रणब मुखर्जी यांना पत्र लिहून राजकीय प्रक्रिया सुरू केली आहे. त्याचे फलित काय, त्याबाबत १० ऑक्टोबपर्यंत न्यायालयास अवगत करावे, असा आदेश सर्वोच्च न्यायालयाने मंगळवारी केंद्र सरकारला दिला. न्या. एच. एल. दत्तू यांच्या अध्यक्षतेखालील पाचसदस्यीय घटनापीठाने म्हटले आहे की, हा प्रश्न अधिक काळ रेंगाळत ठेवता येणार नाही. त्यामुळे नायब राज्यपालांच्या पत्रावर राष्ट्रपतींनी कोणता निर्णय घेतला आहे त्याबाबत न्यायालयास अवगत करावे, असेही न्यायालयाने म्हटले आहे.