केवळ उद्योगपतींनाच अच्छे दिन का? – अण्णा हजारेंचा सवाल

जमीन अधिग्रहण कायद्यात बदल करणारा अध्यादेश मागे घेण्याची मागणी ज्येष्ठ समाजसेवक अण्णा हजारे यांनी सोमवारी नवी दिल्लीमध्ये केली. या अध्यादेशाविरोधात अण्णा हजारे आणि मेधा पाटकर यांच्या नेतृत्त्वाखाली जंतर-मंतरवर धरणे आंदोलन सुरू आहे. त्यामध्ये बोलताना अण्णा हजारे यांनी पंतप्रधान नरेंद्र मोदी यांच्या सरकारवर टीका केली.
ते म्हणाले, आमच्या आंदोलनानंतर केंद्र सरकारने या अध्यादेशात सुधारणा करून विधेयक संसदेमध्ये मांडण्याचे ठरविले आहे. मात्र, मूळ अध्यादेशालाच आमची हरकत आहे. त्यामुळे त्यात सुधारणा न करता तो अध्यादेशच मागे घेण्यात यावा आणि २०१३ मध्ये संसदेमध्ये मंजूर करण्यात आलेला जमीन अधिग्रहण कायदा मूळ स्वरुपात तसाच ठेवावा.
या अध्यादेशाच्या निमित्ताने त्यांनी मोदी सरकारवरही टीका केली. ते म्हणाले, अच्छे दिन आणणार असल्याचे निवडणुकीपूर्वी सांगण्यात येत होते. आम्ही सुद्धा त्यावर विश्वास ठेवून मतदान केले. मात्र, सामान्यांसाठी अच्छे दिन काही आले नाहीत. जमीन अधिग्रहण अध्यादेशामुळे शेतकऱयांचे आणि जमीनधारकांचे नुकसान होणार असून, उद्योगपतींचा फायदा होणार आहे. सरकारला उद्योगपतींनाच अच्छे दिन आणायचे आहेत का, असा प्रश्नही त्यांनी उपस्थित केला.