आग्रामधील ‘राजा की मंडी’ या रेल्वे स्थानकावर एक धक्कादायक घटना घडली आहे. सोमवारी (दि. २७ मे) रोजी स्थानकावर रानी आणि किशोर नावाचे लिव्ह इन पार्टनर बोलत बसले होते. दरम्यान त्यांच्या काही कारणास्तव भांडण झाले. त्यानंतर रानीने आपल्या प्रियकराला घारविण्यासाठी रेल्वे ट्रॅकवर उडी मारली. तिथून ती त्याच्याशी भांडत असतानाच मागून आलेल्या ट्रेनखाली ती चिरडली गेली. या धक्कादायक घटनेचे सीसीटीव्ही चित्रण आता समोर आले आहे.
इंडिय टुडेने दिलेल्या बातमीनुसार, लिव्ह इन पार्टनर रेल्वे स्थानकावर भांडण करत होते. प्रियकराने मद्यपान सोडावे, यासाठी प्रेयसी त्याला समज देत होती. मात्र काही क्षणात तिने ट्रॅकवर उडी घेत, मद्यपान न सोडल्यास जीव देण्याची धमकी दिली. तेवढ्यात वेगाने आलेल्या ट्रेनमुळे ती खाली चिरडली गेली.
सीसीटीव्ही चित्रणात दिसत असल्यानुसार, दोघेही सोमवारी राजा की मंडी स्थानकावर प्लॅटफॉर्म क्र. २ वर आले होते. संभाषण करत असताना मध्येच त्यांच्यात भांडण सुरू झाले आणि त्याचे पर्यवसन नको त्या घटनेत झाले. ट्रॅकवर उतरल्यानंतर मागून वेगात येणाऱ्या केरळ एक्सप्रेसची तिला काहीही कल्पना नव्हती. ट्रेन जवळ आल्यानंतर ती प्लॅटफॉर्मच्या नजीक आली, मात्र तिला वर येता आले नाही आणि क्षणात ती ट्रेनखाली गेली.
यावेळी कर्तव्यावर असलेले आरपीएफ अधिकारी लक्ष्मण पचौरी आणि इतर शिपाई यांनी केरळ एक्सप्रेस गेल्यानंतर तात्काळ प्लॅटफॉर्मवर धाव घेतली आणि रानीला एसएन वैद्यकीय महाविद्यालयात उपचारासाठी दाखल केले. मात्र दुर्दैवाने तिचा उपचारादरम्यान मृत्यू झाला.
जीआरपी पोलीस प्रमुख समर बहादुर यांनी याबाबत लिव्ह इन पार्टनर किशोरचा जबाब घेतला आहे. तो म्हणाला की, रानीच्या आयुष्यात याआधी काही अप्रिय घटना घडल्या होत्या. तिचा पहिला पती धर्मेंद्र हा अति मद्यपानामुळे मृत पावला होता. मागच्या वर्षभरापासून आमचे संबंध होते.
रानीच्या वडीलांना या अपघाताची माहिती देण्यात आली. त्यांनी सांगितले की, पहिल्या पतीपासून तिला तीन मुले आहेत. दोन मुले तिच्याबरोबर राहायची तर मोठा मुलगा वेगळा राहतो. पोलीस निरीक्षक समर बहादुर यांनी सांगितले की, आतापर्यंत कोणतीही तक्रार याबाबत दाखल करण्यात आलेली नाही. जर तक्रार दाखल झाली तर आम्ही पुढे तपास करू.
© IE Online Media Services (P) Ltd
