बळींची संख्या मोजणे वायुदलाचे काम नाही

बालाकोटवरील हल्ल्याच्या यशापयशावरून रणकंदन माजले असताना ‘मारल्या गेलेल्या दहशतवाद्यांचा तपशील सरकार देईल, वायू दल लक्ष्यवेध झाला आहे की नाही ते पाहते, हल्ल्यातील मृतांची संख्या मोजत नाही, असे स्पष्टीकरण वायू दलाचे प्रमुख बी. एस. धनोआ यांनी सोमवारी केले.

पाकिस्तानच्या खैबर पख्तुन्ख्वा प्रांतातील बालाकोट येथील जैश-ए-मोहम्मदच्या तळावर २६ फेब्रुवारीला केलेल्या हवाई हल्ल्यात किती दहशतवादी मारले गेले हे अद्याप स्पष्ट झालेले नाही. या पार्श्वभूमीवर, वायूदल मनुष्यहानी मोजत नाही, असे धनोआ यांनी सांगितले.

या हल्ल्यात सुमारे ३५० दहशतवादी मारले गेल्याचे सरकारी सूत्रांनी म्हटले होते, तर भाजपचे  अध्यक्ष अमित शहा यांनी हा आकडा २५० असल्याचे सांगितले आहे. हल्ल्यात कमी मनुष्यहानी झाल्याचे काही माध्यमांचे म्हणणे आहे, तर विरोधी पक्षांच्या नेत्यांनी या मुद्दय़ावर स्पष्टीकरण मागितले आहे. मात्र याबाबत सरकारने कोणतीही अधिकृत माहिती जाहीर केलेली नाही.

पुलवामा येथील दहशतवादी हल्ल्यानंतर १२ दिवसांनी करण्यात आलेल्या हवाई हल्ल्याबाबत वायुदल प्रमुखांनी प्रथमच मतप्रदर्शन केले. हल्ल्यात किती मनुष्यहानी झाली ते आम्ही सांगू शकत नाही. त्यावेळी तेथे किती लोक होते, यावर ते अवलंबून आहे. ठार झालेल्या दहशतवाद्यांच्या संख्येबाबत सरकार निवेदन करेल, असे धनोआ यांनी स्पष्ट केले.

भारतीय विमानांनी लक्ष्यापासून दूरवर बॉम्बवर्षांव केल्याच्या बातम्यांबाबत विचारले असता, आमची माहिती याच्या उलट आहे असे धनोआ म्हणाले. भारतीय वायुदलाने बालाकोटमधील जंगलात बॉम्ब टाकले असते, तर पाकिस्तानने प्रत्युत्तर देण्याची काही गरजच राहिली नसती, असे मत त्यांनी नोंदवले.

एफ-१६ विमानांच्या वापराबाबत अमेरिका व पाकिस्तान यांच्यात काय करार झाला होता, हे आपल्याला माहीत नसल्याचे सांगून धनोआ म्हणाले, की या विमानांचा आक्रमणासाठी वापर केला जाणार नाही, असा करार झाला असल्यास पाकिस्तानने त्याचा भंग केला आहे, असे मला वाटते. भारताकडे अ‍ॅमराम क्षेपणास्त्रांचे तुकडे आहेत. त्यामुळे त्या संघर्षांत त्यांनी एक एफ-१६ विमान गमावले आहे, असे वायुदल प्रमुखांनी सांगितले.

पाकिस्तानच्या ताब्यातून परतलेले वैमानिक अभिनंदन वर्धमान हे वैद्यकीयदृष्टय़ा सक्षम असल्यास ते लढाऊ विमान चालवतील. वैमानिकाच्या वैद्यकीय सक्षमतेबाबत आम्ही तडजोड करत नाही, असेही धनोआ यांनी स्पष्ट केले.

राफेलबाबत भाष्य करण्यास नकार

राफेल असते तर पाकिस्तानचे एकही विमान वाचले नसते, या पंतप्रधान मोदी यांच्या विधानावर भाष्य करण्यास धनोआ यांनी नकार दिला. राफेल विमाने सप्टेंबपर्यंत वायुदलाच्या ताफ्यात दाखल होतील, अशी माहिती मात्र त्यांनी दिली.