Israel – Hamas War News in Marathi : इस्रायल आणि हमास यांच्यातील संघर्ष दिवसेंदिवस वाढत आहेत. इस्रायलकडून सातत्याने गाझा पट्टीवर हवाई हल्ले होत असून मोठ्या प्रमाणात वित्त आणि जीवितहानी होत आहे. इस्रायलची राजधानी असलेल्या तेल अवीव शहरातही याचे पडसाद उमटत आहे. परिणामी या तणावाच्या पार्श्वभूमीवर एअर इंडियाने तेल अवीवला जाणारी नियोजित उड्डाणे काही काळासाठी स्थगित केली आहेत. या विमान कंपनीने ७ ऑक्टोबरपासून तेल अवीवला जाण्यासाठी आणि तेथून भारतात येणारी नियोजित उड्डाणे रद्द केली होती.
रविवारी एअरलाइनच्या प्रवक्त्याने सांगितले की, तेल अवीवची उड्डाणे ३० नोव्हेंबरपर्यंत स्थगित करण्यात आली आहेत. साधारणपणे, दिल्लीतून तेल अवीवला जाण्यासाठी आठवड्यातून पाच वेळा उड्डाणे असतात. सोमवार, मंगळवार, गुरुवार, शनिवार आणि रविवारी अशी ही सेवा असते. परंतु, आता वाढत्या संघर्षाच्या पार्श्वभूमीवर ही उड्डाणे रद्द करण्यात आली आहेत.
हेही वाचा >> Israel and Hamas War: युद्ध आणखी भीषण होणार? इस्रायलचं लष्कर पुढच्या ४८ तासांत गाझा शहरात धडकणार!
दरम्यान, इस्रायलमध्ये अडकेलेल्या भारतीयांना मायदेशी परत आणण्याकरता सरकारकडून ऑपरेशन अजय राबवण्यात येत आहेत. गेल्या महिन्यात ऑपरेशन अजय अंतर्गत हजारो भारतीय भारतीय मायदेशी परतले. ऑपरेशन अजयसाठी एअर इंडियाने चार्टर्ड सेवा पुरवली होती.
४८ तासांत युद्ध भडकणार?
पुढील ४८ तासांत इस्रायल लष्कर गाझा पट्टीवर आक्रमण करणार असल्याचं वृत्त इस्रायल माध्यमांनी दिलं आहे. तसंच, दक्षिण आणि उत्तर गाझा असे गाझा पट्टीचे दोन भाग झाल्याचेही वृत्तांमध्ये आहे. त्यामुळे येत्या काळात युद्धाचा भडका उडण्याची शक्यता आहे.
