नवी दिल्ली : शरद पवार घर चालवावे तसे राष्ट्रवादी काँग्रेस पक्षाचा कारभार करत होते. फक्त एक व्यक्ती राजकीय पक्ष चालवू शकत नाही. पक्षामध्ये लोकशाही उरली नव्हती, असा थेट आरोप अजित पवार गटाच्या वतीने करण्यात आला. मूळ राष्ट्रवादी काँग्रेस पक्ष कोणाचा, या वादावर सोमवारी केंद्राय निवडणूक आयोगासमोर झालेल्या युक्तिवादामध्ये अजित पवार गटाने शरद पवार यांना लक्ष्य केले.
अजित पवार गटाचा युक्तिवाद सोमवारी पूर्ण झाला. शरद पवार गटाला कागदपत्रे सादर करण्याची चार वेळा संधी देण्यात आली होती. त्यामुळे नवी संधी देऊ नये, ही अजित पवार गटाची विनंती आयोगाने फेटाळली. ३० ऑक्टोबपर्यंत सर्व कागदपत्रे सादर करण्याचे आदेश आयोगाने शरद पवार गटाला दिले असून पुढील सुनावणी ९ नोव्हेंबर रोजी होणार आहे. त्यावेळी ज्येष्ठ वकील अभिषेक मनु सिंघवी शरद पवार गटाची बाजू मांडतील.
हेही वाचा >>> राष्ट्रवादी पक्ष कोणाचा? निवडणूक आयोगातील सुनावणी संपताच शरद पवार गटाचे वकील म्हणाले…
आमदार अपात्रतेवर शुक्रवारी सुनावणी
राष्ट्रवादी काँग्रेसच्या नऊ आमदारांच्या अपात्रतेसंदर्भात प्रदेशाध्यक्ष जयंत पाटील यांनी दाखल केलेल्या याचिकेवर तातडीने सुनावणी घेण्यास सर्वोच्च न्यायालयाने नकार दिला. शिवसेनेच्या आमदारांच्या अपात्रतेचे प्रकरणही सर्वोच्च न्यायालयात असून त्याबरोबर राष्ट्रवादी काँग्रेसच्या प्रकरणाची १३ ऑक्टोबरला सुनावणी होणार आहे.
अजित पवार गटाचा युक्तिवाद
’राष्ट्रवादी काँग्रेसचे कार्यकारी अध्यक्ष प्रफुल पटेल आमच्याबरोबर
’काँग्रेसच्या १९७२ मधील फुटीसंदर्भातील सादिक अली प्रकरणामध्ये संसदीय पक्षातील बहुमत ग्राह्य
’चुकीची कागदपत्रे दिल्याचा आरोप अमान्य
’कॅमेऱ्यासमोर कागदपत्रे तपासण्याची मागणी ’निवडणूक न होताच शरद पवार यांची राष्ट्रीय अध्यक्षपदी नियुक्ती
