एपी, वॉशिंग्टन
अमेरिकेचे अध्यक्ष डोनाल्ड ट्रम्प यांनी कागदी स्ट्रॉच्या सरकारी वापरावर बंदी घालण्याच्या निर्णयावर सोमवारी स्वाक्षरी केली. कागदी स्ट्रॉचा काही उपयोग होत नाही आणि त्या जास्त काळ टिकत नाहीत असे कारण ट्रम्प यांनी दिले आहे. त्याऐवजी अमेरिकी सरकारने केवळ प्लास्टिक स्ट्रॉचाच वापर केला पाहिजे असे त्यांनी सांगितले.
ट्रम्प यांनी स्वाक्षरी केलेल्या आदेशामुळे आता पेपर स्ट्रॉच्या वापराला प्रोत्साहन देण्याच्या आणि प्लास्टिकचा वापर मर्यादित करण्याचे माजी अध्यक्ष जो बायडेन यांचे धोरण पूर्णपणे उलट फिरवण्यात आले. सरकारी संस्थांनी कागदी स्ट्रॉ विकत घेणे थांबवावे आणि संस्थांच्या इमारतीमध्येही त्यांचा पुरवठा केला जाणार नाही याची खबरदारी घ्यावी असे आदेशात नमूद करण्यात आले आहे. ‘‘कागदी स्ट्रॉ वापरण्याची परिस्थिती हास्यास्पद आहे. आम्ही पुन्हा प्लास्टिक स्ट्रॉचा वापर सुरू करत आहोत,’’ असे ट्रम्प यांनी आदेशावर स्वाक्षरी करताना जाहीर केले. ट्रम्प यांनी अध्यक्षपदाच्या पहिल्या कार्यकाळापासूनच प्लास्टिक स्ट्रॉ वापरण्याची भलामण केली होती.
स्थलांतरितावरून पोप यांची टीका
रोम : अमेरिकेतील बेकायदा स्थलांतरितांना देशाबाहेर काढण्याच्या अध्यक्ष ट्रम्प यांच्या निर्णयावर कॅथलिक ख्रिाश्चनांचे सर्वोच्च धर्मगुरू पोप फ्रान्सिस यांनी मंगळवारी टीका केली. स्थलांतरितांना जबरदस्तीने देशाबाहेर काढण्याच्या धोरणामुळे त्यांच्या सन्मानाला धक्का पोहोचतो आणि याचे अंत्य परिणाम वाईट होतील, असा इशारा पोप यांनी अमेरिकेच्या बिशपना लिहिलेल्या पत्राद्वारे दिला. राष्ट्रांना स्वत:चे संरक्षण करण्याचा आणि गुन्हेगारांपासून समाजाला सुरक्षित ठेवण्याचा अधिकार आहे असे मतही पोप यांनी पत्रात व्यक्त केले आहे.
प्लास्टिकविषयी बायडेन यांचे धोरण
बायडेन प्रशासनाच्या धोरणानुसार, २०२७पर्यंत सरकारी वापरासाठी खाण्यापिण्याशी संबंधित विभागांमधून आणि २०३५पर्यंत सर्व सरकारी विभागांमधून स्ट्रॉसह एकल-वापर प्लास्टिकची खरेदी टप्प्याटप्प्याने बंद केला जाणार होता. बायडेन यांचे धोरण मृत असल्याचे ट्रम्प यांनी काही दिवसांपूर्वी समाजमाध्यमांवर जाहीर केले होते.
प्लास्टिकचा वापर सुरू ठेवणे योग्य आहे असे मला वाटते. प्लास्टिक समुद्रामध्ये टाकले गेल्याने शार्क माशांवर काही परिणाम होईल असे मला वाटत नाही. ते त्यांना जे हवे ते खात समुद्रात फिरत असतात. – डोनाल्ड ट्रम्प, अध्यक्ष, अमेरिका
