अमेरिकेच्या राष्ट्रीय सुरक्षा संस्थेने माहिती मिळवण्यासाठी किती विनंत्या पाठवल्या होत्या, याची माहिती मायक्रोसॉफ्ट व फेसबुक या अमेरिकी इंटरनेट तंत्रज्ञान कंपन्यांनी जाहीर केली आहे. सोशल नेटवर्किंग संकेतस्थळ असलेल्या फेसबुकने म्हटले आहे की, २०१२ मधील शेवटच्या सहा महिन्यांत अमेरिकेच्या राष्ट्रीय सुरक्षा संस्थेने माहिती मिळवण्यासाठी नऊ ते दहा हजार विनंत्या पाठवल्या होत्या. स्थानिक कायदा अंमलबजावणी संस्थेला एका मुलाच्या अपहरणाबाबत हवी असलेली माहिती ते अतिरेक्यांच्या धमक्या अशा अनेक प्रकारची माहिती त्यांनी मागितली होती. किमान १८ ते १९ हजार फेसबुक अकाउंटशी संबंधित अशी ही माहिती होती. मायक्रोसॉफ्टकडे ३१ डिसेंबर २०१२ रोजी संपलेल्या वर्षांतील शेवटच्या सहा महिन्यांत ३२ हजार अकाउंटची माहिती मागण्यात आली होती. एकूण ६००० ते ७००० विनंत्या त्यात होत्या. गुन्हेगारी प्रकरणे व इतर घटनांशी संबंधित माहिती त्यांना यात हवी होती, असे मायक्रोसॉफ्टचे उपाध्यक्ष जॉन फ्रँक यांनी सांगितले. जागतिक ग्राहकांचा विचार करता माहिती मागवण्यात आलेल्या अकाउंटची संख्या नगण्य आहे असे फेसबुक व मायक्रोसॉफ्टचे म्हणणे आहे. अमेरिकी सुरक्षा संस्थेने अशा प्रकारे टेहळणीसाठी माहिती घेतल्याचे प्रकरण उघडकीस आल्यानंतर या दोन्ही कंपन्यांनी राष्ट्रीय सुरक्षा संस्थेने इंटरनेट हेरगिरी कार्यक्रमाअंतर्गत केलेल्या विनंत्यांची संख्या जाहीर करण्याची मागणी केली होती.
स्नोडेन चीनसाठी काम करीत होता- किंग
अमेरिकेच्या गुप्त टेहळणी कार्यक्रमाचा पर्दाफाश करणारा एडवर्ड स्नोडेन हा चीन सरकारसाठी काम करीत असावा, असा आरोप अमेरिकी काँग्रेसचे रिपब्लिकन सदस्य पीटर किंग यांनी एमएसएनबीसी टीव्हीवर बोलताना केला. स्नोडेन हा अमेरिकी नागरिक असून अमेरिकी प्रशासनाच्या टेहळणी कार्यक्रमांचे भांडाफोड केल्यानंतर तो आता हाँगकाँगमध्ये जाऊन लपला आहे.
किंग यांनी सांगितले की, पहिले म्हणजे त्याने चीनमध्ये पैसा हस्तांतरित केला, तो चिनी भाषा शिकलेला आहे. त्याच्या मैत्रिणीचे चीनशी संबंध आहेत. जगातील एवढय़ा देशांत तो फक्त चीनला गेला, चीनचे अध्यक्ष अमेरिकेत आले त्यावेळी नेमके त्याने अमेरिकेच्या हेरगिरी कार्यक्रमाचे भांडाफोड केले. तो चीनसाठी काम करीत होता याचे ठोस पुरावे नसले तरी याची पूर्ण चौकशी झाली पाहिजे. ज्या लोकांनी त्याचे विभूतिकरण केले ते देशाचे नुकसान करीत आहेत कारण स्नोडेन याने देशाचा विश्वासघात केला आहे.
