अमेरिकेतून भारतात डुकराच्या मांसाची आयात करण्यासाठी केंद्र सरकारनं परवानगी दिली आहे. भारताच्या इतिहासात पहिल्यांदाच अशी परवानगी देण्यात आली असून ऐतिहासिक पाऊल म्हणून या घटनेकडे पाहिलं जात आहे. अमेरिकेतील डुकरांपासून तयार केलेली विविध उत्पादनं आता भारतात आयात करणं या निर्णयामुळे शक्य होणार आहे. या निर्णयामुळे भारताची बाजारपेठ अमेरिकेसाठी खुली झाली असून अमेरिकेनं या निर्णयाचं स्वागत केलं आहे.
अमेरिकेतून भारतात येणाऱ्या विविध कृषी उत्पादनांपैकी डुक्कर आणि संबंधित उत्पादने हे एक महत्त्वाचं प्रॉडक्ट आहे. मात्र इतर कृषी उत्पादनांप्रमाणं डुकराचं मांस भारतात आयात करायला आतापर्यंत सरकारनं परवानगी दिली नव्हती. यासंदर्भात द हिंदूने दिलेल्या वृत्तानुसार, भारताच्या इतिहासात पहिल्यांदाच अशी परवानगी देण्यात आली असून भारताचे दरवाजे आता पोर्क आणि पोर्क प्रॉ़डक्टसाठी खुले झाले आहेत.
अमेरिकेतून होणाऱ्या वेगवेगळ्या वस्तूंच्या निर्यातीपैकी डुकरांचं मांस आणि त्यापासून तयार होणाऱ्या उत्पादनांचं प्रमाण मोठं आहे. २०२० मधील आकडेवारीनुसार अमेरिका हा डुकरांच्या मांसाचं उत्पादन करणारा जगातील तिसऱ्या क्रमांकाचा देश आहे, तर या पदार्थांची निर्यात करणारा जगातील दुसऱ्या क्रमांकाचा देश आहे. अमेरिकेनं गेल्या वर्षात जवळपास ५ लाख ७० हजार कोटी रुपयांच्या डुकरांच्या मांसाची निर्यात केली आहे. या निर्णयामुळे भारताच्या बाजारपेठेत अमेरिकी मांसाला व्यापाराची मुभा मिळणार आहे.
