Parliament Session : “मी त्यांना विनंती करतो की..”; ओवैसींवर झालेल्या हल्ल्याबद्दल अमित शाहांचं राज्यसभेत स्पष्टीकरण

राज्यसभेचे कामकाज दिवसभरासाठी तहकूब करण्यात आले आहे.

ओवैसी यांच्यावर झालेल्या हल्ल्यानंतर केंद्र सरकारने त्यांना देऊ केलेली झेड सुरक्षा त्यांनी नाकारली होती. या संदर्भात बोलताना अमित शाह यांनी ओवैसी यांना ती सुरक्षा स्विकारण्याची विनंती केली.

ओवैसींचा कार्यक्रम नियोजित नव्हता किंवा त्यांच्या येण्याबद्दल स्थानिक प्रशासनाला कोणतीही सूचना देण्यात आली नव्हती. पोलिसांनी या गोळीबार प्रकरणात दोघांना अटक केली असून दोघांकडून प्रत्येकी एक पिस्तूल जप्त केलं आहे, असं अमित शाह यांनी सभागृहात बोलताना सांगितलं.

हा चेष्टेचा विषय नाही. ज्याने कोणी राष्ट्रपतींचं भाषण लिहिलं होतं, त्याने राष्ट्रपतींवर अन्याय केला आहे. हे भाषण लोकांच्या निर्णयाला आव्हान देणारं असून देशासमोरच्या समस्यांना नाकारणारं आहे, असं मत काँग्रेस नेते आनंद शर्मा यांनी मांडलं आहे. ते संसदेच्या अर्थसंकल्पीय अधिवेशनात बोलत होते. या अधिवेशनाच्या सुरूवातीला राष्ट्रपतींनी केलेल्या भाषणावर सध्या चर्चा सुरू आहे.

आरोपी गेल्या अनेक दिवसांपासून ओवैसींचा पाठलाग करत होते, पण त्यांना हल्ल्याची संधी मिळत नव्हती. जेव्हा ओवेसी मेरठमधून दिल्लीला परतत होते तेव्हा त्यांची गाडी टोलनाक्यावर थांबली होती. हीच संधी लक्षात घेता आरोपींनी वाहनावर गोळीबार केला. हल्ल्यानंतर ओवैसींची कार पंक्चर झाली आणि त्यानंतर ते दुसऱ्या वाहनाने रवाना झाले. सचिन आणि शुभम अशी या हल्लेखोरांची नावं असून ओवैसी यांच्या भाषणांमुळे त्यांच्यात चिड निर्माण झाली होती. तसंच ओवैसींवर हल्ला करण्यासाठी गेल्या अनेक काळापासून ते तयारी करत होते. याचसाठी ते ओवैसींच्या प्रत्येक सभेला हजेरी लावत होते. गुरुवारी उत्तर प्रदेशातील मेरठ येथे झालेल्या सभेतही हे दोघे उपस्थित होते. पोलीस आता या सभेचं सीसीटीव्ही तपासणार आहेत.

“मला झेड दर्जाच्या सुरक्षेची गरज नाही. मला ए दर्जाचे नागरिक होण्याची इच्छा आहे. मला जगायचे आहे, बोलायचे आहे. जेव्हा या देशातील गरीब सुरक्षित असतील, त्यावेळीच मी सुरक्षित असेन. माझ्या कारवर हल्ला करणाऱ्यांना घाबरायची मला गरज नाही. सरकार या हल्लेखोरावर ‘यूएपीए’नुसार का कारवाई करत नाहीत?, असं ओवैसी म्हणाले होते.

उत्तर हापूर येथून दिल्लीला जाताना हापूर-गाझियाबाद राष्ट्रीय महामार्गावर ३ फेब्रवारी रोजी सायंकाळी अज्ञात व्यक्तींनी हल्ला केल्याचा दावा ओवैसी यांनी केला होता. या हल्ल्यात कुणीही जखमी झाले नाही. हा संपूर्ण घटनाक्रम टोलनाक्यावरील सीटीटीव्हीमध्ये कैद झालाय.या हल्ल्याच्या घटनेनंतर ओवैसी यांना केंद्र सरकारने दिलेली झेड दर्जाची सुरक्षा त्यांनी नाकारली आहे. मात्र या हल्ल्यासंदर्भात पहिल्यांदाच केंद्रीय गृहमंत्री भाष्य करणार असल्याने ते नक्की काय बोलतात याकडे संपूर्ण देशाचं लक्ष लागून राहिलेलं आहे.