US Share Market Update: नुकताच महाराष्ट्राचा अर्थसंकल्प सादर करण्यात आला. अर्थसंकल्पातील आकडे निव्वळ घोषणा किती, प्रत्यक्षात उतरणार किती, महाराष्ट्राचा विकास नेमका साधणार किती? यावर सत्ताधारी व विरोधकांमध्ये सध्या जोरदार दावे-प्रतिदावे पाहायला मिळत आहेत. पण तिकडे अमेरिकेच्या शेअर बाजारात महाराष्ट्राच्या पूर्ण अर्थव्यवस्थेपेक्षाही जास्त पैसा फक्त एका दिवसात बुडाल्याचं समोर आलं आहे. अमेरिकन शेअर बाजारातल्या फक्त सात कंपन्यांचं हे नुकसान आहे. संपूर्ण अर्थव्यवस्थेच्या झालेल्या नुकसानाचा आकडा याहून मोठा नक्कीच असू शकेल!
अमेरिकन शेअर बाजारात कोलाहल!
गेल्या काही दिवसांमध्ये डोनाल्ड ट्रम्प यांचं टेरिफ धोरण आणि आंतरराष्ट्रीय भूमिका यामुळे अमेरिकेसह जगभरातल्या शेअर बाजारात तणावाचं वातावरण पाहायला मिळत आहे. भारतीय शेअर बाजारात यामुळे प्रचंड चढ-उतार दिसून येत आहेत. या पार्श्वभूमीवर खुद्द अमेरिकन शेअर बाजारात सोमवारी मोठी पडझड झाली. अमेरिकेतल्या तंत्रज्ञान क्षेत्रातल्या सात मोठ्या कंपन्यांचं मिळून सोमवारी १० मार्च रोजी एका दिवसात तब्बल ७५० अब्ज अमेरिकन डॉलर्स इतकं मोठं आर्थिक नुकसान झाल्याचं समोर आलं आहे.
७ कंपन्या, ७५० अब्ज डॉलर्सचं नुकसान!
अॅपल, मायक्रोसॉफ्ट, टेस्ला, एनविडिया, गुगल-अल्फाबेट, अॅमेझॉन आणि मेटा या अमेरिकेतल्या सात बलाढ्य अशा तंत्रज्ञान कंपन्या आहेत. बाजारपेठेवरची पकड, तंत्रज्ञानाचा वापर आणि ग्राहकांवर प्रभाव या बाबतीत या सात कंपन्या अतीप्रचंड अशा मानल्या जात आहेत. या सात कंपन्यांचं सोमवारी ७५० अब्ज डॉलर्सहून जास्त नुकसान झालं. नॅसडॅकला तर २०२२ पासून गेल्या तीन वर्षांतली ही सर्वात मोठी पडझड सहन करावी लागली.
महाराष्ट्राच्या अर्थव्यवस्थेच्या दीडपट नुकसान
महाराष्ट्राची अर्थव्यवस्था जवळपास ५०० अब्ज डॉलर्स इतकी आहे. पण सोमवारी अमेरिकन अर्थव्यवस्थेत महाराष्ट्राच्या अर्थव्यवस्थेच्या तब्बल दीडपट म्हणजेच ७५० अब्ज डॉलर्सचं नुकसान झालं. तेही एका दिवसात! त्यात एकट्या अॅपलचे १७४ अब्ज डॉलर्स बुडाले! त्यापाठोपाठ एआय चिपमेकर कंपनी असलेल्या एनविडियाचं १४० अब्ज डॉलर्सचं नुकसान झालं आहे. ५ टक्क्यांनी एनविडियाचे शेअर्स खाली आल्यामुळे हे नुकसान झाल्याचं पाहायला मिळालं! जानेवारी महिन्यात एनविडियानं नफ्याचा नवा उच्चांक गाठल्यानंतर गेल्या दीड महिन्यात कंपनीचं मूल्य एक तृतीयांश प्रमाणात कमी झालं आहे.
टेस्लाच्या एकूण बाजारमूल्यात १५ टक्क्यांची घट
एलॉन मस्क यांच्या टेस्ला कंपनीचं एकूण बाजारमूल्य एका दिवसात १५ टक्क्यांनी घटलं. २०२० पासूनची ही टेस्लाची सर्वात वाईट कामगिरी ठरली आहे. सोमवारी टेस्लाचं १३० अब्ज डॉलर्सचं नुकसान झालं. डिसेंबर २०२४ मध्ये कंपनीचं असलेलं मूल्य आता थेट निम्म्यापर्यंत खाली आलं आहे.
गुगल व मायक्रोसॉफ्टचंही मोठं नुकसान
अॅपल,एनविडिया आणि टेस्लापाठोपाठ गुगल-अल्फाबेट व मायक्रोसॉफ्ट या कंपन्यांचंही अनुक्रमे ९८ अब्ज व ९५ अब्ज डॉलर्सचं नुकसान झालं आहे. त्याशिवाय अॅमेझॉन व मेटा या कंपन्यांनीही सोमवारी अनुक्रमे ५० व ७० अब्ज डॉलर्स गमावले.
