जम्मूतील घुसखोरीचा प्रयत्न अयशस्वी

जम्मू क्षेत्रातील आंतरराष्ट्रीय सीमेवर सीमा सुरक्षा दलाच्या जवानांनी शुक्रवारी पहाटे घुसखोरीचा प्रयत्न हाणून पाडला. सीमेवर संशयास्पद हालचाली होत असल्याचे निदर्शनास आल्याने जवानांनी गोळीबारही केला. संशयास्पद हालचाली आढळल्या त्या परिसरात जवानांनी शोध घेतला असता चार लाख ९६ हजार रुपयांचे भारतीय चलन, चिनी बनावटीचे पिस्तूल, सात गोळ्या आणि पाकिस्तानची दोन सीमकार्ड मिळाली, असे दलाच्या एका ज्येष्ठ अधिकाऱ्याने सांगितले. पाकिस्तानमधून काही जणांनी भारतीय हद्दीत प्रवेश केल्याचे आढळताच जवानांनी गोळीबार केला. मात्र गोळीबार होताच घुसखोर पुन्हा पाकिस्तानात पसार झाले. आंतरराष्ट्रीय सीमेवरील अहोरात्र गस्तीमध्ये वाढ करण्यात आली आहे, असे अधिकाऱ्याने सांगितले.