माफिया डॉन व राजकीय नेता अतिक अहमद यांचा मुलगा असद अहमद याचं उत्तर प्रदेश पोलिसांनी झांशी येथे एन्काऊंटर केलं आहे. उमेश पाल हत्याकांडप्रकरणात नाव समोर आल्यापासून असद फरार होता. काही दिवसांपूर्वी उत्तर प्रदेश पोलिसांनी असद आणि त्याच्या अन्य एका साथीदाराचं एन्काऊंटर केलं आहे. यानंतर पोलिसांनी मृत असदचा फोन ताब्यात घेतला होता. या फोनमध्ये पोलिसांना एक भयावह व्हिडीओ आढळला आहे. या व्हिडीओमध्ये असदचे काही साथीदार एका तरुणाला बेदम मारहाण करताना दिसत आहेत.
हा व्हिडिओ जानेवारी २०२१ मधील असून एन्काऊंटरमध्ये मारला गेलेल्या असद अहमदच्या मोबाईलमध्ये सापडला आहे. हा व्हिडीओ असद राहत असलेल्या लखनऊच्या एका फ्लॅटमधील असल्याचं सांगण्यात येत आहे. असद या व्हिडीओमध्ये दिसत नसला तरी लोकांमध्ये भीती आणि दहशत निर्माण करण्यासाठी तो असे व्हिडीओ बनवत असे, अशी माहिती मिळत आहे. याबाबतचं वृत्त ‘जनसत्ता’ने दिलं आहे.
एक तरुण नग्नावस्थेत फरशीवर बसलेला दिसत आहे. तर काही तरुण पीडित तरुणाला बेल्ट आणि लाथांनी बेदम मारहाण करताना दिसत आहेत. हा व्हिडीओ असद अहमदच्या फोनमध्ये आढळला असून सोशल मीडियावर वेगाने व्हायरल होत आहे. या व्हिडीओवर आता नेटकऱ्यांकडून प्रतिक्रिया दिल्या जात आहेत.
