Asaduddin Owaisi Got Invitaion for All Party Meeting : AIMIM चे अध्यक्ष असदुद्दीन ओवैसी यांनी सर्वपक्षीय बैठकीवरून संताप व्यक्त केला होता. या बैठकीत ५ ते १० खासदार असलेल्या पक्षांनाच आमंत्रण दिलं जाईल, असं संसदीय कार्यमंत्री किरेन रिजिजू यांनी स्पष्ट केल्यानंतर ओवैसी यांनी थेट मोदींवर टीका केली होती. आता या बैठकीला असदुद्दीन ओवैसी यांनाही आमंत्रण देण्यात आलं आहे. त्यामुळे तत्काळ दिल्लीला रवाना होणार आहेत. यासंदर्भात त्यांनी स्वतःहून माहिती दिली.

सकाळी १० वाजून ३२ मिनिटांनी असदुद्दीन ओवैसी यांनी एक्स पोस्ट केली होती. या पोस्टमधून त्यांनी केंद्र सरकारवर टीका केली होती. या पोस्टमध्ये ते म्हणाले,“पहलगाम दहशतवादी हल्ल्यासंदर्भात चर्चा करण्याकरता सर्वपक्षीय बैठकीचे आयोजन करण्यात आले. यासंदर्भात मी किरेन रिजिजू यांना काल रात्री संपर्क साधला. ते म्हणाले की ५ ते १० खासदार असलेल्या पक्षांनाच या बैठकीचं आमंत्रण देण्यात येणार आहे. कमी सदस्य पक्षांना आमंत्रण का नाही? असा प्रश्न विचारल्यावर ते म्हणाले की यामुळे बैठक लांबली जाईल. मग मी म्हणालो की आमच्यासारख्या लहान पक्षांचं काय मग?”

“ही भाजपाची किंवा इतर कोणत्याही पक्षाची अंतर्गत बैठक नाही. ही सर्वपक्षीय बैठक आहे. यामुळे दहशतवाद आणि दहशतवादाला पाठिंबा देणाऱ्या देशांना आपल्या देशातील एकतेचा संदेश मिळेल. पंतप्रधान नरेंद्र मोदी सर्व पक्षांचं म्हणणं ऐकून घेण्यासाठी अतिरिक्त वेळ काढू शकत नाहीत का?” असा प्रश्नही त्यांनी यावेळी विचारला.

“तुमच्या पक्षालाही बहुमत नाही. १ खासदार असलेला पक्ष असो वा १०० खासदार असलेला पक्ष असो, ते सर्व भारतीयांनी निवडून दिलेले खासदार आहेत. त्यामुळे अशा महत्त्वाच्या मुद्द्यांवर त्यांना भूमिका मांडण्याचा अधिकार आहे. मी पंतप्रधान नरेंद्र मोदी यांना विनंती करतो की सर्वपक्षीय बैठक सत्यात उतरवा, संसदेतील प्रत्येक खासदाराच्या पक्षाला आमंत्रण मिळालं पाहिजे”, असंही ते म्हणाले.

मग अमित शाहांचा फोन आला अन्…

असदुद्दीन ओवैसींच्या तक्रारीची दखल थेट केंद्रीय गृहमंत्रालयाने घेतली आणि केंद्रीय गृहमंत्री अमित शाहा यांनी त्यांना फोन केला. याबाबत असदुद्दीन ओवैसी म्हणाले, “हा मुद्दा महत्त्वाचा आहे. त्यामुळे या सर्व पक्षांना आमंत्रण दिलं पाहिजे, अशी माझी भूमिका होती. तेवढ्यात मला गृहमंत्री अमित शाहा यांचा फोन आला. त्यांनी विचारलं की कुठे आहे. मी म्हटलं हैदराबादला आहे. त्यांनी फोन करून मला सर्वपक्षीय बैठकीला येण्याचं आमंत्रण दिलं आहे. त्यामुळे मी लवकरात लवकर तिकिट बुक करून तिकडे पोहोचणार आहे. तिकडे मी माझी भूमिका मांडणार आहे.”