Who Brought Tahawwur Rana In India: मुंबईतील २६/११ च्या दहशतवादी हल्ल्यातील मुख्य आरोपी तहव्वुर हुसेन राणाला अखेर भारतात आणण्यात आले असून, त्याला अमेरिकेतून भारतात आणण्याची जबाबदारी राष्ट्रीय तपास संस्थेच्या दोन वरिष्ठ अधिकाऱ्यांवर सोपवण्यात आली होती. यामध्ये एनआयएचे महानिरीक्षक आशिष बत्रा उपमहानिरीक्षक जया रॉय यांचा समावेश होता. या दोन्ही अधिकाऱ्यांनी राणाची अमेरिकेतून भारतात प्रत्यार्पण करण्याची प्रक्रिया पूर्ण करण्यात महत्त्वाची भूमिका बजावली आहे.
एनआयएचे हे पथक तहव्वुर राणाला भारतात आणण्यासाठी रविवारीच अमेरिकेत पोहोचले होते. मंगळवारी संध्याकाळी लॉस एंजेलिसमध्ये उपमहानिरीक्षक जया रॉय यांनी राणाला ताब्यात घेण्यासाठी ‘सरेंडर वॉरंट’वर स्वाक्षरी केली होती. यानंतर, भारतीय पथकाने बुधवारी सकाळी राणाला एका खास विमानाने भारताकडे रवाना केले होते. या कारवाईत इतर तीन गुप्तचर अधिकाऱ्यांनीही सहकार्य केल्याचे सांगण्यात येत आहे.
कोण आहेत आशिष बत्रा?
१९९७ च्या बॅचचे आयपीएस अधिकारी आशिष बत्रा हे झारखंड केडरचे आहेत. ते सध्या एनआयएमध्ये महानिरीक्षक म्हणून कार्यरत आहेत. २०१९ मध्ये पाच वर्षांसाठी त्यांची प्रतिनियुक्ती करण्यात आली होती, जी आता गृह मंत्रालयाने १५ सप्टेंबर २०२४ नंतर आणखी दोन वर्षांसाठी वाढवली आहे.
एनआयएमध्ये दाखल होण्यापूर्वी, बत्रा २० जानेवारी २०१८ पासून झारखंड जग्वार्स (एक विशेष बंडखोरी विरोधी युनिट) चे महानिरीक्षक म्हणून काम करत होते. ते झारखंड पोलिसांचे प्रवक्ते देखील राहिले आहेत. यासह त्यांनी आयजी कॅम्पेनची अतिरिक्त जबाबदारी देखील सांभाळली आहे.
आशिष बत्रा यांनी त्यांच्या कारकिर्दीत अनेक महत्त्वाची कार्यकारी आणि प्रशासकीय पदे भूषवली आहेत. त्यांची सुरुवातीची नियुक्ती जहानाबाद येथे तीन महिन्यांसाठी सहाय्यक अधीक्षक म्हणून झाली होती. यानंतर ते कोएल करो आणि हजारीबागचे पोलीस अधीक्षक होते. यासह ते १९ महिने ते रांची शहराचे पोलीस अधीक्षकही होते.
कोण आहेत जया रॉय?
२०११ च्या बॅचच्या आयपीएस अधिकारी जया रॉय देखील झारखंड केडरच्या आहेत. सध्या त्या एनआयएमध्ये उपमहानिरीक्षक पदावर कार्यरत आहेत. २०१९ मध्ये, त्यांना एएनआयमध्ये चार वर्षांसाठी पोलीस अधीक्षक म्हणून प्रतिनियुक्त करण्यात आले होते.
जया रॉय यांची सर्वात प्रसिद्ध पोस्टिंग जामतारा येथे होती, जिथे त्यांनी सायबर गुन्हेगारांविरुद्ध मोठी कारवाई केली. त्यांच्या नेतृत्वाखाली करण्यात आलेले ते ऑपरेशनवर एक वेब सिरीजही प्रदर्शीत झाली आहे. ज्यामध्ये सायबर गुन्हेगारी आणि झारखंड पोलिसांची कामगिरी दाखवण्यात आली आहे.
