पीटीआय, गुवाहाटी : आसाममधील पूरस्थिती अजूनही गंभीर असून, सुमारे पाच लाख नागरिक बाधित झाले आहेत. पुरामुळे एक जण मृत्युमुखी पडल्याची माहिती अधिकाऱ्यांनी शुक्रवारी दिली. ब्रह्मपुत्रेसह राज्यातील प्रमुख नद्या अनेक ठिकाणी धोक्याच्या पातळीवरून वाहत असल्याची माहितीही त्यांनी दिली. पुढील काही दिवस मुसळधार पावसाचा अंदाज हवामान खात्याने वर्तवला असून, त्यामुळे पाणी पातळी आणखी वाढण्याची शक्यता आहे.
आसाम राज्य आपत्ती व्यवस्थापन विभागाच्या (एएसडीएमए) अहवालानुसार गुरुवारी सायंकाळपर्यंत चार लाख ९५ हजार नागरिकांना पुराचा फटका बसला आहे. उदलगुरी जिल्ह्यातील तामुलपूर येथे पुरामुळे एकाचा मृत्यू झाला. केंद्रीय जल आयोगाच्या अहवालानुसार ब्रह्मपुत्रा नदी नेमतीघाट (जोऱ्हाट) आणि धुबरी येथे धोक्याच्या पातळीवरून वाहत आहे. पुथिमारी (कामरूप), पगलागिया (नलबारी) आणि मानस (बारपेटा) या नद्यांनीही धोक्याची पातळी ओलांडली आहे. विभागीय हवामान केंद्राने शुक्रवारी ‘येलो अलर्ट’ दिला आहे.
राज्याच्या काही भागांत मुसळधार पाऊस आणि गडगडाटासह पावसाचा अंदाज असल्याने सतर्कतेचा इशाराही देण्यात आला आहे. राज्यातील १६ जिल्हे आणि चार उपविभाग पूरग्रस्त झाले आहेत. बजाली उपविभागास पुराचा सर्वाधिक तडाखा बसला आहे. येथील दोन लाख ६० हजार नागरिक बाधित झाले आहेत. सात जिल्ह्यांतील ८३ मदत छावण्यांत १४ हजारांहून अधिक नागरिकांनी आश्रय घेतला आहे. तसेच ७९ मदत वितरण केंद्रे कार्यान्वित आहेत.
