उत्तर प्रदेशमधील स्थानिक स्वराज्य संस्थांच्या निवडणुकीत माफियात अतिक अहमदच्या हत्येच्या मुद्यावरून राजकारण तापत आहे. त्याचदरम्यान प्रयागराजमध्ये एक पोस्टर व्हायरल होत आहे. या पोस्टरबद्दल दावा करण्यात आला आहे की, नॅनी सेंट्रल जेलमध्ये बंद असलेला अतिकचा मुलगा अली याने हे पोस्टर छापून घेतलं आहे. प्रयागराजमधील मुस्लीम समुदायात हे पोस्टर मोठ्या प्रमाणात व्हायरल होत आहे. या पोस्टरमध्ये अतिकच्या हत्याकांडामागे मुख्यमंत्री योगी आदित्यनाथ असल्याचा दावा केला आहे. तसेच याला माजी मुख्यमंत्री अखिलेश यादवही जबाबदार असल्याचं म्हटलं आहे. यामध्ये अलीने म्हटलं आहे की, या लोकांनी आधी माझा भाऊ असदची हत्या केली, त्यानंतर माझे वडील अतिक अहमद आणि काका अशरफ यांची हत्या केली. आता हे लोक माझ्या आईच्या मागे लागले आहेत. या पोस्टरद्वारे अलीने लोकांना आवाहन केलं आहे की, त्यांनी आगामी निवडणुकांमध्ये भाजपा आणि समाजवादी पार्टीच्या उमेदवारांना मतदान करू नये. हे अतिक अहमदच्या मुलाचं पत्र असल्याचं सांगून व्हायरल केलं जात आहे. हे पोस्टर अतिक अहमदचा मुलगा अलीने बनवलं असल्याचा केवळ दावा केला जात आहे. याची पुष्टी अद्याप झालेली नाही. परंतु हे पोस्टर सोशल मीडियावर वेगाने व्हायरल होत आहे. या पत्रात अलीने कोणताही पक्ष किंवा उमेदवाराचं समर्थन केलेलं नाही. परंतु भाजपा आणि सपाला पराभूत करण्याचं आवाहन केलं आहे. या पोस्टरद्वारे अली लोकांची सहानुभूती मिळवण्याचा प्रयत्न करत असल्याचे म्हटलं जात आहे. या पोस्टरवर अतिक अहमद, अशरफ आणि असदचे फोटो छापण्यात आले आहेत, टीव्ही ९ भारतवर्षने यासंबंधीचं वृत्त प्रसिद्ध केलं आहे. हे ही वाचा >> “शिंदे गटाचे आमदार खासगीत सांगतात…”, आमदार नितीन देशमुखांचा दावा, म्हणाले… ज्याच्या नावाने हे पोस्टर व्हायरल होत आहे तो अतिकचा मोठा मुलगा सध्या नॅनी सेंट्रल जेलमध्ये बंद आहे. अतिकचा दुसरा मुलगा लखनौमधल्या तुरुंगात आहे. तर अतिकचा तिसरा मुलगा असद झाशीत एका पोलीस चकमकीत मारला गेला. अतिकची अजून दोन मुलं आहेत. ही दोन मुलंदेखील अनेक गुन्हेगारी प्रकरणांमध्ये सापडली आहेत. परंतु ते दोघेही अल्पवयीन असल्यामुळे त्यांना बालसुधारगृहात ठेवण्यात आलं आहे.
