हत्या, हल्ल्यांच्या निषेधार्थ बांगलादेशात निदर्शक रस्त्यांवर

गेल्या अडीच वर्षांत बांगलादेशातील ६ लेखक व ब्लॉगर्सची निर्घृण हत्या करण्यात आली आहे. यापैकी पाच जण या वर्षी जानेवारीनंतर मारले गेले आहेत. हल्लेखोरांना पकडण्यात सरकार अपयशी ठरल्याचा आरोप मृतांचे कुटुंबीय आणि मित्रांनी केला आहे.यापूर्वी हत्या झालेला नास्तिक लेखक व ब्लॉगर अविजित रॉय याच्यासोबत काम करणारा फैजल दीपान याचा शनिवारी मध्य ढाक्यातील त्याच्या कार्यालयात खून करण्यात आला होता.

त्याच्या काही तास आधीच अज्ञात हल्लेखोरांनी दोन धर्मनिरपेक्ष लेखकांसह रॉय याची पुस्तके प्रकाशित करणारा अमेरिकी नागरिक रशीद तुतुल यांच्यावर केलेल्या हल्ल्यात एक जण गंभीर जखमी झाला होता.

अल-कायदाची भारतीय उपखंडातील शाखा असल्याचे सांगणाऱ्या अन्सर अल-इस्लाम बांगलादेश या संघटनेने या हल्ल्यांची जबाबदारी स्वीकारली आहे.