अमेरिकेतल्या लुईझियाना राज्याची राजधानी बॅटन रुज येथे एका बंदुकधा-याने पोलिसांवर गोळीबार केला. या गोळीबारात ७ पोलीस जखमी झालेत तर तीन पोलीस अधिका-यांचा मृत्यू झाल्याची भिती व्यक्त केली जात आहे. रविवारी सकाळी ही घटना घडली.
बंदुकधारी इसम एअरलाईन महामार्गाच्या दिशेने जात असल्याचा निनावी फोन पोलिसांना आला होता. त्यानंतर पोलिसांनी घटनास्थळी धाव घेतली मात्र पोलिसांना पाहताच त्याने पोलिसांवर गोळ्या झाडल्या.
या चकमकीत आतापर्यंत ७ पोलीस अधिकारी जखमी झालेत. या अधिका-यांना उपचारांसाठी रुग्णालयात दाखल केले असून त्यांची प्रकृती गंभीर असल्याचे समजते आहे. तसेच हा बंदुकधारी मारला गेल्याचे समजते आहे परंतु याबद्दल कोणतीही अधिकृत माहिती समोर आली नाही. येथील स्थानिक वृत्तवाहिनींच्या माहितीनुसार परिसरात गोळीबार अजूनही सुरुच आहे. या घटनेमुळे परिसरात भितीचे वातावरण असून या परिसरातील सुरक्षा वाढवण्यात आली आहे.
