कन्याकुमारीपासून सुरू झालेली काँग्रेसची भारत जोडो यात्रा सध्या हरियाणामध्ये पोहोचली आहे. खासदार राहुल गांधी यांच्या नेतृत्वाखालील या यात्रेत काँग्रेसचे हजारो कार्यकर्ते काश्मीरच्या दिशेने पायी चालत आहेत. एकीकडे कडाक्याची थंडी असताना दुसरीकडे काँग्रेसच्या कार्यकर्त्यांचा उत्साह अधिकच वाढताना दिसतोय. राहुल गांधी यांना थंडी कशी वाजत नाही? ते फक्त टीशर्टवर कसे काय चालत आहेत? असे प्रश्न उपस्थित केले जात आहेत. असे असताना हाडं गोठवणाऱ्या थंडीत काँग्रेसचे काही कार्यकर्ते चक्क शर्टविना दिसले आहेत. हे कार्यकर्ते धुकं आणि थंडीमध्ये चक्क नाचत होते.काँग्रेस कार्यकर्त्यांच्या या कृतीकडे राहुल गांधी यांच्यावर केल्या जाणाऱ्या टीकेला उत्तर म्हणून पाहिले जात आहे.
हेही वाचा >>> “फडणवीसांनी मध्यस्थी करावी” म्हणणाऱ्या सुप्रिया सुळेंना चित्रा वाघ यांचं प्रत्युत्तर; म्हणाल्या, “आम्हाला…”
सध्या दिल्ली, हरियाणा, पंजाब, काश्मीर तसेच उर्वरीत भारतात कडक्याची थंडी पडली आहे. असे असतानाही राहुल गांधी फक्त टीशर्टवर कसे राहू शकतात? त्यांना थंडी वाजत नाही का? असे प्रश्न उपस्थित केले जात आहेत. याच मुद्द्यावरून भाजपाच्या नेत्यांकडूनही टीका-टिप्पणी केली जात आहे. याच पार्श्वभूमीवर हरियाणामधील कर्नाल येथे काँग्रेसच्या कार्यकर्त्यांनी केलेली कृती सर्वांचेच लक्ष वेधून घेत आहे. भारत जोडो यात्रा तसेच राहुल गांधी यांचे स्वागत करताना काँग्रेसचे काही कार्यकर्ते चक्क शर्टविना दिसले आहेत. एकीकडे कडाक्याची थंडी तसेच धुकं असताना हे कार्यकर्ते दंडबैठका काढत आहेत. बसवर उभे राहून ते आम्हाला थंडीची पर्वा नाही, असे सूचित करत आहेत. काँग्रेस कार्यकर्त्यांच्या या कृतीला राहुल गांधी यांच्यावर टीका करणाऱ्यांना प्रत्युत्तर म्हणून पाहिले जात आहे.
हेही वाचा >>> थंडी वाजत नाही का? म्हणणाऱ्यांना राहुल गांधींचे सणसणीत उत्तर; म्हणाले “माझ्या टीशर्टपेक्षा…”
राहुल गांधी यांना थंडी का वाजत नाही, असा प्रश्न उपस्थित केला जात असतानाच उत्तर प्रदेशच्या उपमुख्यमंत्र्यांनी असा कोणता जीवाणू आहे, ज्यामुळे थंडी वाजत नाही, यावर संशोधन सुरू आहे, असे विधान केले होते. “राहुल गांधी आपल्या डॉक्टरांकडून थंडीबाबत संशोधन तर करत नाही ना? राहुल गांधींना थंडी न वाजण्यामागे कोणता जीवाणू आहे, याची आम्ही माहिती घेत आहोत. तसेच, राहुल गांधी हे खरे गांधी वाटत नाहीत. राजीव गांधी यांच्याबद्दल त्यांना काही माहिती आहे का?,” असा प्रश्न ब्रजेश पाठक यांनी उपस्थित केला.
हेही वाचा >>> Air India peeing case : लघुशंका केलेल्या सीटवरच महिलेला बसवलं? सहप्रवाशाने सांगितलं ‘त्या’ दिवशी विमानात नेमकं काय घडलं!
दरम्यान राहुल गांधी यांनी त्यांच्या टीशर्टवर प्रश्न उपस्थित करणाऱ्यांना सणसणीत उत्तर दिले होते. मला एक कळत नाही, माझ्या टी शर्टवर एवढा आक्षेप का घेतला जातो? एवढी चर्चा का केली जाते आहे. या टी-शर्टमध्ये एवढं आक्षेप घेण्यासारखं काय आहे? इथे कुणीही टी शर्ट घातलेला नाही का? तुम्हाला काय वाटतं मी स्वेटर घालू? त्यापेक्षा मी एक काम करतो भारत जोडो यात्रा संपल्यानंतर मी एक व्हिडिओ तयार करतो. त्यात मी हे सांगेन की टी-शर्ट घालून कसं चालतात. थंडी कशी कमी करतात? असा टोला राहुल गांधी यांनी लगावला होता.
