बिहारच्या कैमूर जिल्ह्यात एक अजब प्रकार समोर आला आहे. येथे एका गोदामात जप्त करण्यात आलेल्या बियरचे 200 कॅन रिकामे आढळले आहेत. ही दारू उंदरांनी फस्त केल्याचे कारण येथील अधिकाऱ्यांनी दिलं आहे. यापूर्वीही बिहारमध्ये तब्बल नऊ लाख लिटर दारू गायब झाली होती, त्यावेळीही अधिकाऱ्यांनी उंदरांवर आरोप केला होता.
कैमूर जिल्ह्यात विविध ठिकाणी केलेल्या कारवायांत जप्त करण्यात आलेली दारू भभुआ येथील गोदामात ठेवण्यात आली होती. उत्पादन शुल्क विभागाने 2016 पासून काढलेल्या मोहिमांमध्ये ही दारू तस्करांकडून जप्त करण्यात आली होती. सोमवारी ही दारु नष्ट करण्याचे काम सुरू असताना 200 बियरच्या कॅन रिकाम्या आढळल्या. उंदरांनी या बियरच्या कॅन कुरतडल्या, त्यामुळे त्या सर्व कॅनला छिद्र पडलं होतं, परिणामी त्या कॅन रिकाम्या झाल्या असू शकतात असं उत्तर अधिकाऱ्यांनी दिलं आहे. भभुआ जिल्ह्याचे डीएम अनुपम कुमारींनी दिलेल्या माहितीनुसार, कोर्टाच्या आदेशानंतर जिल्ह्यातील जप्त केलेली दारु नष्ट करण्याची मोहिम सुरू होती. ज्यावेळी गोदामात पोहोचलो तेव्हा बियरच्या कॅनला छिद्र दिसत होतं आणि त्यातून दारु गायब होती.
दारुबंदी असलेल्या बिहारमध्ये पोलिस ठिकठिकाणी छापेमारी करुन दारु जप्त करतात, त्यानंतर ही दारु गोदामात ठेवली जाते आणि नंतर ती नष्ट करण्यात येते. बिहारमध्ये एप्रिल 2016 पासून दारुबंदी आहे. गेल्या वर्षीही येथे तब्बल नऊ लाख लिटर दारू गायब झाल्याचं समोर आलं होतं, त्यानंतर उंदरांनी ही दारु फस्त केल्याचं खुद्द पोलिसांनीच जाहीर केले होते. त्यामुळे दारूबंदी झाल्यापासून बिहारमधील उंदीर बेवडे झालेत की काय असा प्रश्न एखाद्याला नक्कीच पडू शकतो.
