पीटीआय, श्रीनगर
जम्मू-काश्मीर विधानसभेमध्ये सलग तिसऱ्या दिवशी राज्याच्या विशेष दर्जावरून गोंधळ झाला. भाजपच्या अर्ध्याहून अधिक आमदारांना मार्शलच्या सहाय्याने सभागृहाबाहेर काढल्यानंतर भाजपच्या सर्व आमदारांनी सभागृहाबाहेर प्रतिविधानसभा स्थापन करून सत्र घेतले.जम्मू-काश्मीर विधानसभेमध्ये विशेष दर्जाच्या ठरावावरून गेले तीन दिवस रणकंदन सुरू आहे. गुरुवारी मार्शल आणि भाजपचे आमदार यांच्यात धक्काबुक्कीही झाली.
शुक्रवारी विधानसभेचे कामकाज सुरू झाल्यानंतर ‘पाकिस्तानचा अजेंडा चालणार नाही,’ अशा घोषणा भाजप आमदारांनी सभागृहात दिल्या. सभागृहाच्या हौद्यातही काही आमदार उतरले. त्यांना मार्शलच्या सहाय्याने सभागृहाबाहेर काढण्याचे आदेश विधानसभेचे अध्यक्ष अब्दुल रहीम रादर यांनी दिले.आमदारांना बाहेर काढल्यानंतर उर्वरित अकरा आमदारांनी सभात्याग केला. ८८ जागांच्या विधानसभेत भाजपचे २८ आमदार आहेत.
हेही वाचा >>>मुख्यमंत्र्यांसाठीचे सामोसे खाल्ले कुणी? CID करतेय चौकशी; राज्यभर त्याचीच चर्चा!
विशेष दर्जासंबंधी ठरावाला विरोध
सभागृहाबाहेर भाजपच्या आमदारांनी प्रतिविधानसभेची स्थापना केली. विशेष दर्जा पूर्ववत करण्याचा ठराव बेकायदा आणि घटनाबाह्य असल्याचे आमदार या वेळी म्हणाले. प्रतिविधानसभा ही नॅशनल कॉन्फरन्सच्या विरोधात आहे. या पक्षाने सभागृहाचा ताबा घेतला आहे, असा आरोप भाजपच्या नेत्यांनी केला. भाजप आमदार बळवंतसिंह मंकोटिया यांनी सांगितले, की नॅशनल कॉन्फरन्सच्या सदस्यांनी सभागृहाचा जवळपास ताबाच घेतला आहे. असे आम्ही होऊ देणार नाही. घटनात्मक संकट या पक्षाने उभे केले आहे. त्यांनी नियमांचे उल्लंघन केले आहे.
© The Indian Express (P) Ltd