कर्नाटक विधानसभा निवडणुकीचा निकाल लागून तीन दिवस उलटले आहेत. कर्नाटकात काँग्रेसला बहुमतापेक्षा अधिक जागा मिळाल्या आहेत. असं असलं तरी पक्षाने अद्याप मुख्यमंत्रीपदाचा उमेदवार घोषित केला नाही. मुख्यमंत्रीपदावरून कर्नाटकमधील वरिष्ठ नेत्यांमध्ये रस्सीखेच असल्याचं बोललं जात आहे. कर्नाटकचा मुख्यमंत्री निवडण्यासाठी काँग्रेसच्या वरिष्ठ नेत्यांकडून अनेत बैठका घेतल्या जात आहेत.
काँग्रेसच्या या राजकीय हालचालींवरून भाजपाच्या आयटी सेल विभागाचे प्रमुख अमित मालवीय यांनी टोलेबाजी केली आहे. सर्कस बघायची आहे का? कर्नाटकात काँग्रेसने आपला मुख्यमंत्री निवडला पाहा, असा उपरोधिक टोला मालवीय यांनी लगावला. त्यांनी ट्वीट करत ही टीका केला.
हेही वाचा- “१६ आमदार अपात्र ठरणार नाहीत”; अजित पवारांच्या विधानावर फडणवीसांची प्रतिक्रिया, म्हणाले, “पोपट…”
मालवीय ट्वीटमध्ये म्हणाले, “भारतीय जनता पार्टीही आपला मुख्यमंत्री निवडण्यासाठी चर्चा आणि विचारविनिमय करते आणि सहजपणे मुख्यमंत्री निवडला जातो. सविस्तर सल्लामसलत करूनही भाजपाचे उमेदवार एकमेकांवर कधीही टीका करत नाहीत. किंवा समर्थकांना एकत्र आणणे आणि प्रसारमाध्यमांद्वारे पक्षाला गुप्त धमक्या देणं, हे भाजपात तुम्हाला कधीही दिसणार नाही.”
“याउलट, काल सायंकाळी डीके शिवकुमार यांनी क्लॅरिजेस येथे पत्रकारांची बैठक आयोजित केली. तिथे उपस्थित असणाऱ्या पत्रकारांनी सिद्धरामय्या यांना कर्नाटकचे मुख्यमंत्री म्हणून जवळपास घोषित केलं. काँग्रेसमधील ही स्थिती खेदजनक आहे. काँग्रेसचे अध्यक्ष मल्लिकार्जुन खरगे हे स्वतः निर्णय घेणारे किंवा निर्णय घेणार्‍या गटाचा एक भागही नाहीत, ते केवळ पोस्टमॅन म्हणून काम करताना दिसतात. ते नेहमी कोणत्या ना कोणत्या हायकमांडचा संदर्भ देतात,” असा टोला मालवीय यांनी लगावला.
