मनसे म्हणजे मतदार आणि उमेदवार नसलेली सेना आहे असं म्हणत मनसे अध्यक्ष राज ठाकरे यांच्यावर भाजपाने निशाणा साधला आहे. सध्या मनसे अध्यक्ष राज ठाकरे मोदींच्या विरोधात प्रचार करत आहेत. काँग्रेस आणि राष्ट्रवादीला फायदा झाला तरीही चालेल मात्र मोदी आणि अमित शाह यांना हटवा अशी आक्रमक भूमिक राज ठाकरे यांनी घेतली आहे. त्यांच्या भाषणांमधून ते कायमच मोदींवर टीका करताना दिसत आहेत. अशात आता भाजपाने एक व्यंगचित्र ट्विट करून राज ठाकरेंवर टीका केली आहे.

महाराष्ट्र नवनिर्माण सेना आणि राज ठाकरे यांच्या संदर्भातली तीन व्यंगचित्र दाखवत भाजपाने राज ठाकरेंवर निशाणा साधला आहे. महाराष्ट्र नवनिर्माण सेनेकडे सुरूवातीला १३ आमदार होते असे दाखवण्यात आले आहे. त्यानंतर २०१४ असे लिहून तेच व्यंगचित्र दाखवण्यात आले आणि १३ पैकी एकच आमदार दाखवून मतदार नसलेली सेना म्हणजे मनसे असा अर्थ लिहिण्यात आला आहे. तर २०१९ मध्ये राज तेच व्यंगचित्र दाखवले आणि त्यात राज ठाकरे एकटे पडले आहेत एक चाकी सायकलवर ते बसले आहेत आणि त्यांच्या आसपास कुणीही नाही असे म्हणत उमेदवार नसलेली सेना असा उल्लेख तिसऱ्या व्यंगचित्रात करण्यात आला आहे. प्रत्येकवेळी राज ठाकरेंचा करिष्मा असेही शीर्षक एका बाजूला देण्यात आले आहे.

१३ उमेदवार असताना राज ठाकरे यांना रथात बसलेलं दाखवण्यात आलं आहे. १ आमदार उरल्यावर त्यांना एका हातगाडीवर बसलेले दाखवण्यात आले आहे तर २०१९ मध्ये म्हणजेच सद्यस्थिती राज ठाकरेंकडे फक्त एका चाकाची सायकल उरली आहे असे दाखवण्यात आले आहे. ही टीका राज ठाकरेंना चांगलीच झोंबण्याची शक्यता आहे. आता या टीकेला राज ठाकरेंकडून किंवा मनसेकडून काही उत्तर दिलं जाणार का? हे पहाणं महत्त्वाचं ठरणार आहे. याआधीही मुख्यमंत्री देवेंद्र फडणवीस यांनीही राज ठाकरेंना झोंबणारीच टीका केली आहे. राज ठाकरे दुसऱ्याच्या लग्नात नाचत आहेत असंही त्यांनी म्हटलं आहे. तर राज ठाकरेंच्या सभा म्हणजे कॉमेडी शो आहेत असे विनोद तावडेंनी म्हटले होते. आता या सगळ्यावर राज ठाकरे काय बोलणार हे पहाणे महत्त्वाचे आहे.