भाजपाला मोठा रसगुल्ला मिळणार; ममतांचा अमित शाह यांच्यावर प्रतिहल्ला

पश्चिम बंगाल विधानसभा निवडणुकीसाठी पहिल्या टप्प्यातील मतदान पार पडल्यानंतर अमित शाह यांनी माध्यमांशी संवाद साधला होता. बंगालमध्ये भाजपा दोनशेपेक्षा अधिक जागा जिंकेल, असा दावा त्यांनी केला होता. शाह यांच्या या दाव्यावरून पश्चिम बंगालच्या मुख्यमंत्री आणि तृणमूल काँग्रेसच्या नेत्या ममता बॅनर्जी यांनी शाह यांना टोला लगावला आहे.

आणखी वाचा- मुख्यमंत्रीपदासाठी मिथून तयार

चंदीपूर येथील प्रचार सभेत बोलताना ममता बॅनर्जी यांनी भाजपा आणि अमित शाह यांच्यावर निशाणा साधला. “भाजपा सर्व जागा जिंकणार असल्याचा दावा का करत नाही. बाकीच्या जागा त्यांनी काँग्रेस आणि कम्युनिस्ट पार्टीसाठी सोडल्या आहेत का? पण, भाजपाला मोठा रसगुल्लाच मिळणार आहे,” असा टोला ममतांनी लगावला आहे. “पहिल्या टप्प्यातील मतदान पार पडल्यानंतर लगेच भाजपा असे दावे का करत आहे. केंद्रीय संस्थांनीही उर्वरित टप्प्यातील मतदान होईपर्यंत तटस्थपणे कामं करावं. लोकांना भाजपाला मतदान करण्यासाठी प्रवृत्त करून नये,” अशी टीकाही ममतांनी केली.

काय म्हणाले होते अमित शाह?

“पश्चिम बंगाल आणि आसाममध्ये पहिल्या टप्प्यात मतदान शांततेत पार पडले. त्यानंतर कार्यकत्र्यांकडून मिळालेल्या प्राथमिक माहितीनुसार बंगालमध्ये भाजपाची भगवी लाट आल्याचे संकेत मिळाले. पहिल्या टप्प्यात तेथे ३६ जागांवर मतदान झाले. त्यापैकी २६ जागा भाजपाला मिळतील आणि इतर टप्प्यात २९४ सदस्यीय पश्चिम बंगाल विधानसभा निवडणुकीमध्ये भाजपाला २०० हून अधिक जागा मिळतील, असं शाह म्हणाले होते.