पीटीआय, भुवनेश्वर ओडिशा म्हणजे नवीन पटनाईक यांच्या बिजू जनता दलाचा (बिजद) बालेकिल्ला. २००० सालापासून या राज्यात बिजदचीच सत्ता होती. अगदी लोकसभा निवडणुकांमध्येही या राज्यात याच पक्षाची सरशी होती. मात्र यंदाच्या निवडणुकीत नवीनबाबूंच्या या बालेकिल्ल्याला भाजपने मोठा धक्का दिला. ओडिशातील लोकसभेच्या २१ जागांपैकी भाजपने २० जागांवर विजय मिळवला, तर बिजदला एकही जागा मिळाली नाही. एकेकाळचा भाजपचा मित्रपक्ष असलेल्या बिजदची यंदाच्या निवडणुकीपूर्वी भाजपबरोबर आघाडी करण्याची चर्चा सुरू होती. मात्र जागावाटप आणि प्रदेश भाजप नेत्यांच्या विरोधामुळे दोनही पक्षांची आघाडी आकारास येऊ शकली नाही. त्यामुळे या राज्यात भाजपविरोधात बिजद अशीच लढत पाहायला मिळाली. ओडिशाच्या अस्मितेचा मुद्दा उपस्थित करत भाजपने निवडणुकीत पटनाईक यांच्यावर जोरदार हल्लाबोल केला. २४ वर्षे मुख्यमंत्री असलेल्या पटनाईक यांना मातृभाषा येत नसल्याचा मुद्दा भाजपने प्रचारात वारंवार मांडला. तसेच त्यांच्या प्रकृतीविषयी अफवा पसरवण्यात आल्या़ त्याचा फटका बिजद पक्षाला बसला़ केंद्रीय मंत्री धमेंद्र प्रधान, भाजपचे राष्ट्रीय प्रवक्ते संबित पात्रा, भाजपचे राष्ट्रीय उपाध्यक्ष बैजयंत पांडा महत्त्वाच्या उमेदवारांनी ओडिशामध्ये विजय मिळवला. हेही वाचा >>>नरेंद्र मोदींसाठी इटलीच्या पंतप्रधान मेलोनी यांची पोस्ट; खास फोटो शेअर करत म्हणाल्या, “आपण एकत्र काम करू, शेवटी..” प्रथमच भाजपचे सरकार १४७ विधानसभेच्या जागा असलेल्या ओडिशा विधानसभेत भाजपने प्रथमच सत्ता मिळवली आहे. भाजपने ८० जागांवर विजय मिळवला आहे, तर सत्ताधारी बिजद पक्षाला ४९ जागा मिळाल्या आहेत. पाच वेळा मुख्यमंत्रीपद भूषविलेल्या नवीन पटनाईक हिंजिली मतदारसंघातून विजयी झाले असले तरी त्यांना सहाव्यांदा मुख्यमंत्रीपदी विराजमान होण्याची संधी ओडिशातील जनतेने दिली नाही. विक्रम प्रस्थापित करण्यास अपयश २००० सालापासून ओडिशाच्या मुख्यमंत्रीपदी विराजमान असलेल्या नवीन पटनाईक यांचे सर्वाधिक काळ मुख्यमंत्रीपद भूषविण्याचे स्वप्न भंगले. ‘सिक्कीम डेमोक्रेटिक फ्रंट’चे प्रमुख पवनकुमार चामलिंग यांनी २४ वर्षे १६५ दिवस सिक्कीमचे मुख्यमंत्रीपद सांभाळले, तर पटनाईक हे २४ वर्षे ९१ दिवस मुख्यमंत्रीपदी होते. विधानसभेत बिजू जनता दलाची सत्ता आली असती तर ७७ वर्षीय पटनाईक यांना हा विक्रम करता आला असता. माकपचे ज्योती बसू २३ वर्षे १३७ दिवस पश्चिम बंगालच्या मुख्यमंत्रीपदी होते.
