भाजपच्या लोहपुरुषाला गंज चढलाय -नितीश

राष्ट्रीय लोकशाही आघाडीतून बाहेर पडलेल्या संयुक्त जनता दलाचे नेते व बिहारचे मुख्यमंत्री नितीशकुमार यांनी भाजपवर सोमवारी बोचरी टीका केली. भाजप लोहपुरुष मानते त्या लालकृष्ण अडवाणी यांनाच गंज चढला आहे, ते पक्षात एकाकी पडले आहेत, अशा शब्दांत त्यांनी पूर्वाश्रमीच्या सहकाऱ्यांची खिल्ली उडवली. ‘जनता के दरबारमें मुख्यमंत्री’ या कार्यक्रमात ते बोलत होते.
पंतप्रधानपदाच्या नावासाठी नरेंद्र मोदी यांच्या नावाची घोषणा झाल्यानंतर भाजपमध्ये उत्सवी वातावरण आहे, मात्र सर्वसामान्य लोकांना त्याविषयी काहीएक वाटत नाही, या घोषणेनंतरही लोकांमध्ये उत्साह दिसत नाही. मोदींना पुढे केल्याने आगामी निवडणुकीत आपल्याला खूप लाभ होईल, असे भाजपला वाटत आहे, मात्र निकाल लागेल तेव्हा त्यांचा भ्रमनिरास होईल, असा दावा नितीशकुमार यांनी केला. गुजरातमधील नियोजित सरदार स्मारकावरून त्यांनी मोदी व अडवाणी यांना लक्ष्य केले. सरदार वल्लभभाई पटेल यांच्या स्मारकासाठी गावागावांतून लोखंड गोळा करण्याचा उपद्व्याप मोदी करीत आहेत, इथे मात्र त्यांच्या लोहपुरुषालाच गंज चढला आहे, अडवाणी एकाकी पडले आहेत, अशी त्यांनी खिल्ली उडवली.
‘रालोआ’च्या परराष्ट्र धोरणावर टीका
भाजपचे पंतप्रधानपदाचे उमेदवार नरेंद्र मोदी यांच्याद्वारे पाकिस्तान आणि चीनबरोबरचा सीमाप्रश्न काँग्रेसकडून चुकीच्या पद्धतीने हाताळण्यात आल्याची टीका करण्यात आल्यानंतर काँग्रेसने रालोआविरोधात शड्ड थोपटले आहेत़  रालोआच्या परराष्ट्र धोरणावर काँगेसने सडकून टीका केली आह़े  रालोआच्या काळातील ‘लाहोर बस, कंदहार विमान अपहरण, संसदेवर हल्ला’, आदी गोष्टींची आठवण करून देत, या परंपरेचा त्यांना अभिमान आहे का, असा खोचक प्रश्न माहिती आणि प्रसारणमंत्री मनीष तिवारी यांनी केला आह़े  ट्विटरच्या माध्यमातून तिवारी यांनी ही टीका केली आह़े  
ही तर भाजपची विनाशकाले विपरीत बुद्धी -नितीशकुमार